4 قاڭتار 2018, 11:41 1790 0 مادەنيەت انار لەپەسوۆا

تورەعالي تورەالى: ۇلتتان بيىك ەمەسپىن!

YouTube جەلىسىندە ءانشى تورەعالي تورەالىنىڭ كوپشىلىك الدىندا كەشىرىم سۇراعان ۆيدەوسى پايدا بولدى. وندا الماتىدا جەلتوقسان ايىنىڭ سوڭىندا وتكەن «تاۋەلسىزدىككە تارتۋ» اقىندار ايتىسىندا ساحناعا شىققان ءساتى كورىنىس تاپقان. 

حالىقتىڭ الدىنا شىققان ءانشى كەشىرىم سۇراماس بۇرىن «مەنەن باسقا نە جاڭالىق بولىپ جاتىر؟» دەپ كوپشىلىكتى ءبىر دۋ كۇلدىرىپ الدى. «سىناپ تا، سىباپ تا الىپ جاتىرسىزدار. ول مەن ءۇشىن جىگەرلەندىرۋ بولدى. سىزدەردەي قورعايتىن ەل-جۇرت باردا، قولدايتىن اللا باردا مەنىڭ ەڭسەمدى تىكتەپ ۇستاپ جۇرمەۋگە ەشقانداي قاقىم جوق دەپ ويلايمىن، اعايىن. قازاقتا ءبىر جاقسى ءسوز بار عوي: «ءوزىنىڭ تۋعان جەرىنىڭ تاسىنا سۇرىنگەن ەر-جىگىتتىڭ اياعى اقسامايدى» دەگەن. بۇنىڭ ءبارى مەن ءۇشىن ۇلكەن ساباق بولدى. بۇلتتان بيىك بولسام دا، ۇلتتان بيىك ەمەسپىن، اعايىن. كەم-كەتىگىم بولسا - ەركەلىگىم دەپ، شالالىعىم بولسا - بالالىعىم دەپ قابىلدارسىزدار»، - دەدى تورەعالي تورەالى.

ءانشى ءوز سوزىندە «بۇگىنگى ايتىسىمىزدىڭ ءوزى تاۋەلسىزدىككە تارتۋ، ياعني تت ەكەن. مەنى دە تت ەتكەن وسى ايتىس. ول - سىزدەرسىزدەر»، دەپ ءسوزىن جالعادى. «كەشىرىم سۇرايمىن. اعايىنىم، سىزدەردى قاتتى جاقسى كورەمىن. ونى مەن سوزىممەن راستاپ، ەشقانداي اقتالماي-اق، جۇرەكتەرىڭىز سەزەر دەپ ويلايمىن»، - دەگەن ول «اقيقات» اتتى جاڭا تۋىندىسىن ورىنداپ بەردى.

ەسكە سالا كەتسەك، وتكەن ايدا پاۆلوداردا بولعان كونتسەرتتە ءانشى تورەعالي ءتورالىنىڭ زالداعى كورەرمەنمەن ءسوز تالاستىرىپ، ونىڭ شىعىپ كەتۋىن تالاپ ەتۋى تۋرالى ۆيدەو تاراعان بولاتىن. ءانشىنىڭ بۇل قىلىعى الەۋمەتتىك جەلىدە قىزۋ تالقىلانىپ، تورەعالي تورەالى كوپشىلىك تاراپىنان ۇلكەن سىنعا ۇشىراعان ەدى.

 

سوڭعى جاڭالىقتار