9 تامىز 2017, 17:04 1115 0 جاھان دينارا مىڭجاسارقىزى

اۋعانستاندا "تاليبان" كەپىلگە العان 235 ادام بوساتىلدى

اۋعانستان بيلىگى "تاليبان" قوزعالىسى ەلدىڭ سولتۇستىگىندەگى شالعايداعى ەلدى مەكەندە كەپىلدەگى 235 ادامدى بوساتتى. 8 تامىزدا "تاليبان" مۇندا 50 بەيبىت تۇرعىندى ولتىرگەنى حابارلانعان. "تاليبان" كىسى ءولتىرۋ مەن كەپىلگە ادام الۋدى "يسلام مەملەكەتى" (يم) ەكسترەميستىك ۇيىمىنىڭ سودىرلارىمەن بىرلەسىپ جاساعان. ەكى ۇيىمنىڭ بىرگە ارەكەت ەتۋى سيرەك بولادى.

"8 تامىز كۇنى كەشكە جەرگىلىكتى اقساقالدار مەن ءۋالايات باسشىلارىنىڭ ارالاسۋىمەن ميرزا ولاننان 235 ادام، ونىڭ ىشىندە بالالار مەن ايەلدەر بوساتىلدى" دەپ حابارلادى France Press اگەنتتىگىنە ساري-پۋل ءۋالاياتىنىڭ رەسمي وكىلى زابيۋللا اماني. ونىڭ سوزىنشە، كەپىلدەگىلەر ساري-پۋل قالاسىنا امان-ەسەن جەتكىزىلگەن. كەپىلدە ەندى قانشا اداما قالعانى ازىرگە بەلگىسىز.

ارنايى قىزمەتتەگى دەرەككوز اگەنتتىككە ميرزا ولاندا كەپىلدە 100 شاقتى ادام وتىرعانىن حابارلاعان. بۇل ەلدى مەكەن سودىرلار وتكەن اپتانىڭ سوڭىندا باسىپ العان ساري-پۋل اۋدانىندا ورنالاسقان.

جەرگىلىكتى شەنەۋنىكتەردىڭ اقپاراتى بويىنشا، "تاليبان" مەن يم سودىرلارى 5 تامىزدا نەگىزىنەن شيتتەر تۇراتىن ەلدى مەكەندە 50-گە تارتا ەر، ايەل جانە بالانى ولتىرگەن. قاندى قىرعىن سودىرلار مەن ۇكىمەتتى قولدايتىن جەرگىلىكتى جاساقتار اراسىنداعى ەكى كۇندىك ۇرىستان كەيىن بولعان. قاقتىعىستان سوڭ 150 وتباسى تۇتقىنعا تۇسكەن.

 

سوڭعى جاڭالىقتار