15 ءساۋىر 2015, 13:56 4463 0 رۋحانيات انار لەپەسوۆا

جەتىسۋدا ءدۇبىرلى ايتىس ءوتتى

تالدىقورعانداعى ءى.جانسۇگىروۆ اتىنداعى مادەنيەت سارايىندا «ماڭگىلىك ەل» تاقىرىبىمەن وتكەن وبلىستىق اقىندار ايتىسى ءوز مارەسىنە جەتتى. بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى.
«نۇر وتان» پارتياسىنىڭ الماتى وبلىستىق فيليالى جانە وبلىستىق مادەنيەت باسقارماسىنىڭ ۇيىمداستىرعان ايتىستا اقىندار قازاق حاندىعىنىڭ 550, ۇلى جەڭىستىڭ 70, قازاقستان حالقى اسسامبلەياسى مەن كونستيتۋتسيامىزدىڭ 20 جىلدىق مەرەيتويلارىنىڭ تاعىلىمىن جىرمەن تانىتىپ، تاۋەلسىز ەلىمىزدىڭ جەتىستىكتەرىن پاش ەتىپ، الەۋمەتتىك جاعدايىن تىلگە تيەك ەتتى.
ءسوز سايىسىنىڭ باس جۇلدەسىن تالدىقورعاندىق جانار تولەۋ يەلەنىپ، وعان 250 مىڭ تەڭگە اقشالاي سىيلىق بەرىلدى. 1-ورىن دا تالدىقورعاندىق اقىنعا بۇيىرىپ، اياگوز سەرىكقىزى جۇلدە تۇعىرىنا كوتەرىلدى. ەكى 2-ورىن ەسكەلدى اۋدانىنىن كەلگەن العىسبەك داۋرەن مەن تالعارلىق ارزىگۇل قايىڭبەك، ەكى ءۇشىنشى ورىن ەسكەلدى اۋدانىنىڭ اقىنى باۋىرجان ماقسات پەن اقسۋلىق اقىن قانات بوقانعا بەرىلدى. جۇلدەگەرلەردىڭ بارلىعى اقشالاي سىيلىقتارمەن ماراپاتتالدى.
سونىمەن قاتار ءسۇيىنباي اتىنداعى ارنايى جۇلدە جاناتبەك ايدارالىگە، باقتىباي جولبارىسۇلى اتىنداعى ارنايى جۇلدە ەلدوس اكىمبەككە، جامبىل اتىنداعى ارنايى جۇلدە دارحان سەرىككە، سارا تاستانبەكقىزى اتىنداعى ارنايى جۇلدە اياۋلىم جۇمابەكقىزىنا، بەلسەنە قاتىسقانى ءۇشىن فاتيح اقىنۇلى مەن بۇركىتقازى ادىلبەككە ۇسىنىلدى.

سوڭعى جاڭالىقتار