13 ءساۋىر 2015, 16:12 2679 0 مۋلتيمەديا ءنازيا جويامەرگەنقىزى

تۇركى ەلدەرىنەن «جىلدىڭ ەڭ ۇزدىگى» اتانعاندار ماراپاتتالدى

تۇركيانىڭ ادىيامان قالاسىندا تۇركى ەلدەرىنىڭ ەڭ ۇزدىك جەڭىمپازدارىن ماراپاتتاۋ شاراسى ءوتتى. جىل سايىن ەڭ ۇزدىك جۋرناليست، شەنەۋنىك، ساياساتكەر، ءانشى ت.ب. اراسىندا وتكىزىلەتىن GAP وسكار سايىسىنىڭ بيىلعى جەڭىمپازدارى انىقتالدى.

ادىيامان ۋنيۆەرسيتەتىنىڭ سالتانات زالىندا ۇيىمداستىرىلعان بۇل جيىندا سىيلىقتاردى تابىستاۋ شاراسىن بىرنەشە تەلەارنا تىكەلەي ەفيردەن كورسەتتى. سالتاناتتى شارادا ءسوز العان GAP جۋرناليستەر بىرلىگىنىڭ باسشىسى زەينەل ابيدين كىيمازدىڭ ايتۋىنشا، ۇستىمىزدەگى جىلى سايىسقا ءازىربايجان، سولتۇستىك كيپر تۇركيا مەملەكەتى، بولگاريا، كوسوۆا، رۋمىنيا، يراك، سيريا، شىعىس تۇركىستان، ماروككو، البانيا ەلدەرىنەن ۇمىتكەرلەر قاتىسقان. قاتىسۋشىلار مەن جەڭىمپازداردى مەرەكەمەن قۇتىقتاعان ادىيامان قالاسىنىڭ اكىمى حۇسرەف كۋتلۋ ءوزى باسقاراتىن قالانىڭ تىنىشتىق پەن ىنتىماقتاستىق مەكەنىنە اينالعانىن ايتتى. سونىمەن، «ەڭ ۇزدىك ساياساتكەر» اتاعىن بيىل ادىيامان قالاسىنان سايلانعان اكر پارتياسىنىڭ دەپۋتاتى احمەت ايدىن قانجىعاعا بايلادى. قۇتتىقتاۋ سوزىندە: «ساياساتكەرلەردىڭ ەڭ جاقىن دوستارىنىڭ قاتارىنداعى جۋرناليستەردىڭ دە ماراپاتقا يە بولعانى قۋانتادى. ويتكەنى مەن قول جەتكىزگەن تابىستاردا جۋرناليستەردىڭ دە ۇلەسى بار»، – دەدى. قالا گۋبەرناتورى مامۋت دەميرتاش: «انادولىنى مەزوپوتامياعا جالعاعان ادىيامان بۇگىنگى كەرەمەت كەشتى ۇيىمداستىرىپ وتىر. دەموكراتيالىق مادەنيەتتىڭ دامۋىندا بۇقارالىق اقپارات قۇرالدارىنىڭ ىقپالى زور. GAP جۋرناليستەر وداعى قۇرىلعالى بەرى وسى باعىتتان تايعان ەمەس. تاراتاتىن اقپاراتتارى مەن حابارلارى ارقىلى ايماقتاعى قيىندىقتار مەن كەلەڭسىزدىكتەردى جويۋعا، ءوڭىردى ناسيحاتتاۋدا زور ۇلەس قوسۋدا»، – دەدى.

«جىلدىڭ ەڭ ۇزدىك ءجۋرناليسى» اتاعىنا يە بولعان ارىپتەسىمىز مەتين حارىكچى: «بۇل سىيلىقتى مەن بۇكىل جۋرناليستەردىڭ ارقاسىندا جانە بارلىق ارىپتەستەرىمنىڭ اتىنا الدىم»، – دەپ اعىنان جارىلدى. «جىلدىڭ ەڭ ۇزدىك ساياساتكەرى» اتاعىنا يە بولعان – ءازىربايجان ءماجىلىسىنىڭ دەپۋتاتى گانيرە باشاەۆا. ال مەردجاان تۆ ارناسىنىڭ جۇرگىزۋشىسى مۇستافا الوعلۇنىڭ «الاوعلۇ مەن اپتاعا شولۋ» باعدارلاماسى «جىلدىڭ ەڭ ۇزدىك تەلەباعدارلاماسى» اتاندى.

سوڭعى جاڭالىقتار