29 قىركۇيەك, 17:20 260 0 جاڭالىقتار اسىل تۇمار

ەلباسى شىمكەنتتەگى مەديتسينالىق قۇرال-جابدىقتار شىعاراتىن كاسىپورىندا بولدى

قازاقستاننىڭ تۇڭعىش پرەزيدەنتى نۇرسۇلتان نازارباەۆ شىمكەنت قالاسىندا مەديتسينالىق قۇرال-جابدىقتار، مەديتسينالىق جيھازدار مەن مەديتسينالىق كولىكتەر شىعاراتىن كاسىپورىندا بولدى.

ەلباسىنىڭ رەسمي سايتىنىڭ مالىمەتىنشە، 2013 جىلدان باستاپ قازىرگى ۋاقىتقا دەيىن «كازمەدپريبور» جشس 15 مىڭنان استام مەديتسينالىق قۇرال-جابدىق، 120 مىڭنان استام مەديتسينالىق جيھاز بەن 742 جەدەل جاردەم كولىگىن جاساپ شىعاردى.

كاسىپورىن 2005 جىلى قۇرىلعان. شىمكەنت قالاسىنىڭ اكىمى م.ايتەنوۆ ەلباسىعا جەكە ينۆەستوردىڭ قاراجاتىنا سالىناتىن 1000 ورىندىق كوپسالالى ۋنيۆەرسيتەتتىك اۋرۋحانا قۇرىلىسى تۋرالى اقپارات بەردى.

جاڭا مەديتسينالىق مەكەمەدە انا مەن بالا ورتالىعى، حيرۋرگيالىق، تەراپەۆتىك ورتالىقتار، سونىمەن قاتار ءبىر اۋىسىمدا 700 ادامعا قىزمەت كورسەتەتىن كلينيكالىق-دياگنوستيكالىق ورتالىق جۇمىس ىستەيتىن بولادى دەپ جوسپارلانىپ وتىر.

سونداي-اق «سامۇرىق-قازىنا» اكتسيونەرلىك قوعامىنىڭ باسقارما توراعاسى ا.ەسىموۆ پاندەميا كەزىندە ۇلتتىق ءال-اۋقات قورى تاراپىنان دەنساۋلىق ساقتاۋ جۇيەسى مەن وتاندىق وندىرۋشىلەردى قولداۋ ءۇشىن قابىلدانعان شارالار تۋرالى ايتتى.

سونىمەن قاتار نۇرسۇلتان نازارباەۆقا ەلوردا مەن الماتىدا مەديتسينالىق ورتالىقتار سالۋ جونىندەگى تاپسىرمانىڭ ورىندالۋ بارىسى باياندالدى. ا.ەسىموۆ ەلباسىنا 3000 دانا كولەمىندە «اۆيفاۆير» ءدارىسىن ساتىپ الۋ جانە كوروناۆيرۋسقا قارسى ۆاكتسينا جەتكىزۋ بويىنشا جاسالعان كەلىسىم تۋرالى مالىمەت بەردى.

«كازمەدپريبور» جشس شىعاراتىن نەگىزگى ءونىم تۇرلەرى: مەديتسينالىق ماشينالار; وكپەنى جاساندى جولمەن تىنىستاندىراتىن اپپاراتتار (تۋربينالىق، نەوناتالدىق، پورتاتيۆتىك); پاتسيەنتتەرگە ارنالعان مونيتورلار; ەلەكتروكارديوگرافيا اپپاراتى; زەرتحانالىق شكاف; فۋنكتسيونالدى كەرەۋەتتەر جانە ت.ب. وندىرىستىك قۋات كولەمى: مەديتسينالىق قۇرال-جابدىق – جىلىنا 50 مىڭ دانا; مەديتسينالىق جيھاز – جىلىنا 150 مىڭ دانا; مەديتسينالىق كولىك – جىلىنا 1000 دانا.

سونىمەن قاتار ءونىمنىڭ جاڭا تۇرلەرى – وكپەنى جاساندى جولمەن تىنىستاندىراتىن تۋربينالىق اپپارات، جاڭا تۋعان نارەستەلەرگە ارنالعان ينكۋباتور، جاڭا تۋعان نارەستەلەرگە ارنالعان وكپەنى جاساندى جولمەن تىنىستاندىراتىن اپپاراتتار شىعارادى. قازاقستاندىق قامتۋ ۇلەسى 51,2-تەن 98 پايىزعا دەيىن.

 

سوڭعى جاڭالىقتار