27 قىركۇيەك, 16:11 404 0 جاڭالىقتار اسىل تۇمار

جەلىنى شۋلاتقان جول ورتاسىنداعى گاز قۇبىرى ايدىڭ سوڭىنا دەيىن الىنادى

ماڭعىستاۋ وبلىسىنىڭ اتاش اۋىلىندا سالىنىپ جاتقان كولىك جولىنا قاتىستى داۋلى سۇراققا نۇكتە قويىلدى. كوشە ورتاسىنداعى گاز قۇبىرى اي سوڭىنا دەيىن جەر استىنا كومىلەتىن بولدى.

تۇپقاراعان اۋدانىنا جۇمىس ساپارىمەن بارعان «جول اكتيۆتەرىنىڭ ۇلتتىق ساپا ورتالىعىنىڭ» قىزمەتكەرلەرىنە جەرگىلىكتى بيلىك وكىلدەرى وسىلاي دەپ مالىمدەدى.

ەلىمىزدە جولداردىڭ ساپاسىن باقىلايتىن مەملەكەتتىك كاسىپورىن فيليالى ماڭعىستاۋ وبلىسى اكىمدىگىمەن ارىپتەستىك كەلىسىمشارتتا وتىر. وسىعان سايكەس شالعاي وڭىردە اۆتوموبيل جولدارىنا قاتىستى تۋىنداعان كەز كەلگەن ماسەلەگە ارالاسۋعا مۇددەلى.

ەسكە سالا كەتسەك، 23 قىركۇيەك كۇنى تۇپقاراعان اۋدانى اتاش ەلدىمەكەنىنىڭ ب.اقسامباەۆ كوشەسىنە اسفالت توسەۋ كەزىندە گاز قۇبىرى جول ورتاسىندا قالىپ قويعان. ونى كورگەن اۋىل تۇرعىندارى الەۋمەتتىك جەلىلەرگە جاريالاپ، شۋ شىعارعان ەدى. ماسەلەنىڭ ءمان-جايىنا ۇڭىلسەك، الگى جولدى جوبالاعان سەرىكتەستىك كوشە بويىندا تومەن قىسىمدى گاز قۇبىرى تۇرعانىن ۇمىتقان. ونىڭ ورنىن اۋىستىرۋ تۋرالى اۋىلدى گازبەن جابدىقتاۋشى مەكەمەگە تەحنيكالىق تالاپتاردى دا جىبەرمەگەن. جول سالىپ كەلە جاتقان مەردىگەر مەكەمە قىزمەتكەرلەرى قۇبىردى اينالىپ وتپەي، ۇستىنەن اسفالت توسەپ تاستايدى. سول كۇنى قۇرىلىس باسىندا ۋچاسكە باستىعى دا بولماپتى. قىركۇيەك بىتكەنشە گاز قۇبىرى جول استىنا جىبەرىلەتىن بولدى. سوسىن مەردىگەر مەكەمە ءوز قارجىسىنا كوشەنىڭ وسى بولىگىنە قايتادان اسفالت توسەيدى.

جول ساپاسىن باقىلاۋشىلار تۇپقاراعان اۋداندىق جولاۋشىلار كولىگى جانە اۆتوموبيل جولدارى ءبولىمىنىڭ جانە تەحنيكالىق باقىلاۋ مەكەمەسىنىڭ قىزمەتكەرلەرىن ءوز جۇمىسىنا جاۋاپتى بولۋعا شاقىردى. تاياۋ كۇندەرى الگى كوشە جولىنان سىنامالار الىنىپ، ساپاسى اقتاۋدا زەرتحانادا تەكسەرىلەدى.

سوڭعى جاڭالىقتار