23 قىركۇيەك, 10:11 291 0 جاھان انار لەپەسوۆا

ۇلىبريتانيا بيلىگى شەكتەۋ شارالارىن كۇشەيتتى

ۇلىبريتانيادا كوروناۆيرۋستىڭ ەكىنشى تولقىنى باستالدى. ىندەتتىڭ ورشۋىنە جول بەرمەۋ ءۇشىن ەل بيلىگى شەكتەۋ شارالارىن قايتا كۇشەيتتى. بۇل تۋرالى ۇلىبريتانيا ۇكىمەتىنىڭ باسشىسى بوريس دجونسون مالىمدەدى.

پاندەميا باستالعالى ەلدە 406 مىڭنان استام ادام ىندەتكە شالدىققان. وسىدان بىرەر اي بۇرىن قاتەرلى ۆيرۋستى جۇقتىرعاندار سانى ازايىپ، ەپيدەميولوگيالىق احۋال تۇراقتانا باستاعانداي ەدى. الايدا ىندەتتىڭ جاڭا تولقىنى باستالىپ، كوروناۆيرۋسقا شالدىققاندار سانى قايتادان ارتا ءتۇسى.

ۆيرۋستىڭ تارالۋىن تەجەۋ ماقساتىندا ۇكىمەت قاتاڭ شارالاردى ەنگىزدى. بۇدان بىلاي ەلدەگى مەيرامحانالار ساعات كەشكى ونعا دەيىن عانا جۇمىس ىستەيدى. بارلىق مەكەمە قىزمەتكەرلەرى بەتپەرتە تاعۋى ءتيىس. سونداي-اق ۇيلەنۋ تويلارىنا شاقىرۋعا رۇقسات ەتىلگەن قوناقتار سانى 15-تەن اسپاۋى ءتيىس. بۇعان دەيىن ۇلىبريتانيالىقتار توي-تومالاققا 30 ادامعا دەيىن شاقىرا الاتىن.

«قىس باستالىسىمەن ۆيرۋستىڭ تارالۋى كۇشەيەدى. سوڭعى ەكى اپتادا اۋرۋحاناعا تۇسكەن ناۋقاستار سانى ەكى ەسە ارتتى. كارانتيننەن كەيىن قالپىنا كەلە باستاعان كاسىپورىندارعا شەكتەۋ كەرى اسەر تيگىزەتىنىن بىلەمىن. دەگەنمەن، ۆيرۋستىڭ تارالۋىنا جول بەرمەۋ ءۇشىن بىرقاتار شارالاردى قولعا الۋعا تۋرا كەلەدى»، - دەدى ۇلىبريتانيا پرەمەرى.

ەسكە سالا كەتەيىك، بۇعان دەيىن يسپانيادا دا كارانتين كۇشەيتىلگەن بولاتىن. ەل استاناسىنىڭ بىرنەشە اۋدانىن قامتيتىن شەكتەۋ 2 اپتاعا سوزىلادى. تۇرعىندار ۇيلەرىنەن تەك جۇمىسقا، مەكتەپكە نەمەسە دارىگەرگە قارالۋ ءۇشىن عانا شىعا الادى. ساياباقتار جابىلىپ، دۇكەندەر كەشكى ساعات 22:00-گە دەيىن عانا جۇمىس ىستەيدى. 6 ادامنان كوپ كىسىنىڭ جينالۋىنا تىيىم سالىنادى.

سوڭعى جاڭالىقتار