22 قىركۇيەك, 14:25 412 0 جاڭالىقتار اسىل تۇمار

كارانتين رەجيمىن بۇزعان الماتىلىقتارعا 5 ملن تەڭگە ايىپپۇل سالىندى

الماتى قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىندە مونيتورينگ توپتارىنىڭ جۇمىسى بارىسىندا سوڭعى اپتادا 10 نىساندا جانە 51 جەكە تۇلعانىڭ كارانتين رەجيمىن بۇزعانى انىقتالدى. ايىپپۇلدىڭ جالپى سوماسى – 5 ملن تەڭگە.

«مونيتورينگ توپتارى وسى جىلدىڭ 17 تامىزىنان بەرى شاعىن جانە ورتا بيزنەس سالاسىندا ەپيدەميالىق تالاپتاردى ساقتاۋىنا قاتىستى 9 مىڭنان استام تەكسەرۋ جۇرگىزدى. اكىمشىلىك قۇقىق بۇزۋ بويىنشا 3801 حاتتاما تولتىرىلدى. 2693 جەكە تۇلعاعا ماسكا رەجيمىن بۇزعانى ءۇشىن ايىپپۇل سالىندى. شاعىن جانە ورتا بيزنەستىڭ 1635 سۋبەكتىسى ءوز ەركىمەن قىزمەتىن توقتاتتى. سوتتىڭ قاراۋىنا 19 ماتەريال تاپسىرىلدى»، – دەپ حابارلادى قالا اكىمدىگىنىڭ ءباسپاسوز قىزمەتى.

نەگىزگى ءتارتىپ بۇزۋ فاكتىلەرى – ماسكا رەجيمىنىڭ ساقتالماۋى، جۇمىس رەجيمىنىڭ بۇزىلۋى، دەزينفەكتسيالىق قۇرالداردىڭ جوقتىعى، سونىمەن بىرگە جاپپاي كوپشىلىك شارالاردى ۇيىمداستىرۋ.

«18 قىركۇيەكتە جەتىسۋ اۋدانى جانگەلدين كوشەسى، 193 مەكەنجايىندا ورنالاسقان «دانيار» مەيرامحاناسىندا ۇزاتۋ توي وتكىزىلگەنى تۋرالى اقپارات كەلدى. ودان كەيىن جەدەل تۇردە مونيتورينگ توبى جەتىسۋ اۋدانىنىڭ جەرگىلىكتى پوليتسيا قىزمەتىنىڭ قىزمەتكەرلەرىمەن بىرلەسىپ تەكسەرۋگە باردى. بانكەت 50 ادامنىڭ قاتىسۋمەن وتكىزىلگەن. جەكە كاسىپكەرگە قر اكىمشىلىك قۇقىق بۇزۋ كودەكسىنىڭ 425-بابى 1-تارماعى بويىنشا 230 اەك مولشەرىندە ايىپپۇل سالىندى»، –دەلىنگەن حابارلامادا.

بۇدان بولەك، 20 قىركۇيەكتە تۇنگى ۋاقىتتا مەدەۋ اۋدانىندا جەكەمەنشىك ۇيدە قۇدالىق وتكىزىلىپ جاتقانى تۋرالى اقپارات كەلىپ تۇسكەن. تەكسەرۋ بارىسىندا اقپارات راستالعان. شارا ۇيىمداستىرۋشىلارىنا قاتىستى ەكى اكىمشىلىك حاتتاما تولتىرىلدى.

«سونىمەن قاتار اۋەزوۆ اۋدانىنىڭ مونيتورينگ توپتارىنىڭ جۇمىسى بارىسىندا «مياتا» كافەتەريىنىڭ تۇنگى 23-00-دەن كەيىن جۇمىس ىستەگەنى، سونداي-اق، ادامداردىڭ توپتاسىپ، جينالعانى انىقتالدى. اكىمشىلىك قۇقىق بۇزۋ كودەكسىنىڭ 425-بابى 1-تارماعىنا سايكەس 230 اەك مولشەرىندە ايىپپۇل سالىندى. باس مەملەكەتتىك دارىگەردىڭ 2020 جىلعى 15 تامىزداعى قاۋلىسىنا سايكەس، ۇيلەنۋ تويىن، مەرەيتوي، قۇدايى تاماق وتكىزۋگە تىيىم سالىنعان. سونىمەن بىرگە ۇيگە كوپ ادامنىڭ كەلۋىنە بولمايدى. بۇل شارالار كوروناۆيرۋس ينفەكتسياسىنىڭ تارالۋ قاۋپىن تومەندەتۋ ءۇشىن قاجەت»، – دەلىنگەن اقپاراتتا.

سوڭعى جاڭالىقتار