20 قىركۇيەك, 14:59 357 0 جاھان انار لەپەسوۆا

ۇلىبريتانيادا كارانتيندى بۇزعاندارعا سالىناتىن ايىپپۇل وسەدى

ۇلىبريتانيادا كارانتين تالاپتارىن بۇزعاندارعا سالىناتىن ايىپپۇل كولەمى كوبەيەدى. 

Daily Telegraph باسىلىمىنىڭ حابارلاۋىنشا، كوروناۆيرۋس جۇقتىرعانى راستالعان جانە ەكى اپتالىق كارانتيندى بىرنەشە رەت بۇزعان ازاماتتار كەلەسى اپتادان باستاپ 10 مىڭ فۋنتقا دەيىن (13 مىڭ دوللارعا دەيىن) تولەمەك.

ەلدەگى ىندەتتىڭ تارالۋىن باقىلاۋ ءۇشىن قۇرىلعان Test جانە trace باعدارلاماسى قىزمەتكەرلەرىنىڭ ۇسىنىستارىنا قۇلاق اسپايتىن تۇرعىندار دا وسىنشا كولەمدە ايىپپۇل ارقالايدى.

بۇدان بولەك، ۇلىبريتانيا ۇكىمەتى التى ادامنان ارتىق جينالعاندارعا قارجىلىق ايىپپۇلدى ون ەسەگە - 100 فۋنتتان مىڭعا دەيىن ارتتىرۋدى جوسپارلاۋدا.

دجونس حوپكينس ۋنيۆەرسيتەتىنىڭ دەرەگىنشە، پاندەميا باستالعالى ۇلىبريتانيادا 393 مىڭعا جۋىق ادام كوروناۆيرۋس جۇقتىرعان. ەلدە ىندەت قۇرباندارىنىڭ سانى 42 مىڭعا جۋىقتادى.

ال الەمدە ىندەتكە شالدىققاندار سانى 30,6 ميلليوننان اسىپ جىعىلدى. قاتەرلى ۆيرۋستان 955 841 ادام قايتىس بولدى.

ايتا كەتەيىك، وتكەن تاۋلىكتە قازاقستاندا 63 ادامنان كوروناۆيرۋس انىقتالىپ, ىندەت جۇقتىرعانداردىڭ جالپى سانى 107 262-گە جەتتى. ىندەتتەن 1671 وتانداسىمىز كوز جۇمدى. 102 مىڭعا جۋىق ادام ەمدەلىپ شىقتى.

سوڭعى جاڭالىقتار