19 قىركۇيەك, 17:23 304 0 جاڭالىقتار اسىل تۇمار

رومان سكليار الماتى وبلىسىنا جۇمىس ساپارمەن باردى

بۇگىن پرەمەر-ءمينيستردىڭ ورىنباسارى رومان سكليار الماتى وبلىسىنا جاساعان جۇمىس ساپارى بارىسىندا تالدىقورعانداعى قۇرىلىسى ءجۇرىپ جاتقان ماڭىزدى الەۋمەتتىك نىسانداردى ارالاپ، قۇرىلىس جۇمىستارىنىڭ بارىسىمەن تانىستى.

ءبىرىنشى كەزەكتە ۆيتسە-پرەمەر وبلىس ورتالىعىنداعى 8 بولىكتەن تۇراتىن 200 ادامعا ارنالعان ءمودۋلدى ينفەكتسيالىق اۋرۋحاناعا ات باسىن بۇردى. قۇرىلىس سالاسىنداعى سوڭعى ۇلگىدەگى جەتىستىكتەردى قولدانا وتىرىپ جىلدام قارقىنمەن سالىنىپ جاتقان بۇل نىسان ءوڭىر باسشىسى ا.باتالوۆتىڭ تاپسىرماسى بويىنشا قازان ايىندا اياقتالۋى ءتيىس. قۇرىلىستىڭ باسى-قاسىندا جۇرگەن مەردىگەر مەكەمە وكىلدەرى مەن وبلىستىق قۇرىلىس جانە دەنساۋلىق ساقتاۋ باسقارمالارىنىڭ باسشىلارى بۇگىنگى كۇنى قۇرىلىس جۇمىستارىنىڭ قانشا پروتسەنتى اياقتالعاندىعىن، پايدالانۋعا وتكىزۋ مەرزىمىن، مەديتسينا جابدىقتارىنىڭ كەزەڭ-كەزەڭىمەن جەتكىزىلىپ جاتقانىن، وسى مەكەمەدە ناۋقاستارعا قىزمەت كورسەتەتىن ماماندار (كادر ماسەلەسى) تۋرالى باياندادى.

وسىدان كەيىن رومان سكليار الەمدىك دەڭگەيدەگى جارىستاردى وتكىزۋگە ارنالعان اۋماعى 27 مىڭ شارشى مەتردى قۇرايتىن جابىق ءجۇزۋ باسسەينىنە باردى. نىساننىڭ قۇرىلىسىن جۇرگىزىپ جاتقان مەكەمە وكىلىنىڭ حابارلاۋىنشا، قۇرىلىس جۇمىستارىن قازان، قاراشا ايلارىندا تولىقتاي اياقتاۋ جوسپارلانىپ وتىر. كەلەسى كەزەكتە وبلىس اكىمى ۇكىمەت باسشىسىنىڭ ورىنباسارىنا كوتتەدجدى قالاشىقتا سالىنىپ جاتقان ۇيلەردى كورسەتتى.

قالا اكىمى عالىمجان ءابدىرايىموۆ بۇگىندە 71 تۇرعىن ءۇي پايدالانۋعا بەرۋگە دايىن تۇرعاندىعىن جانە تاعى 349 ءۇي جىل سوڭىنا دەيىن سالىنىپ بىتەتىندىگىن حابارلادى. ۆيتسە-پرەمەر وڭىرگە ساپارى بارىسىندا ستۋدەنتتەرگە ارنالعان 13 قاباتتى 288 ورىندىق جاڭا جاتاقحاناعا بارىپ، ستۋدەنتتەردىڭ تۇرمىس جاعدايىن سۇرادى. وسىندا تۇرىپ جاتقان ستۋدەنتتەر جاستارعا دەگەن قامقورلىعى ءۇشىن ەل اعالارىنا ريزاشىلىعىن ءبىلدىردى.

سوڭعى جاڭالىقتار