17 قىركۇيەك, 18:45 489 0 اتاجۇرت باقىتبەك قادىر

ۇشەمنىڭ اتا-اناسى ءۇيسىز ءجۇر

ەلىمىزدىڭ دەموگرافيالىق احۋالى رەتتەلۋى ءۇشىن قازاقستاندا تۋعان ءاربىر بالانىڭ ومىرگە كەلۋىنىڭ ءوزى ءبىر قۋانىشتى مەرەكە بولۋى ءتيىس.  سونىمەن قاتار شەتەلدەن ەلگە ورالعان ءار قازاق تا سونداي. 

وتكەن جىلعى ستاتيستيكالىق ءمالى­مەت­تەرگە سۇيەنسەك، قازاقستان الەمدە جەر كو­لەمىنەن 9-ورىندا، ال حالىق سانى بويىن­شا 64-ورىن الادى. حالىق تىعىز­دىعى جونىنەن ەلىمىز بۇۇ مويىنداعان 195 تاۋەلسىز مەملەكەت تىزىمىندە 184-ورىن­دا تۇر. قازاقستانداعى حالىق­تىڭ ورتاشا تىعىزدىعى 1 كم²-گە نەبارى – 5,8 ادام، ال الەمدە 1 شارشى كم-گە 56 ادامنان كەلەدى. رەسەيدە – 8,6 ادام، قىتايدا – 145 ادام، وزبەكستاندا – 73 ادام ء(انديجان وبلىسىندا – 1 شارشى كم-گە 700 ادام). سون­دىقتان دا ەلىمىز ءۇشىن جان سانى قاشاندا ماڭىزدى. بۇل رەتتە پرەزيدەنت قاسىم-جومارت توقاەۆ حالىققا ارناعان جولداۋىندا ەلىمىزدىڭ تۋ كورسەتكىشتەرىنىڭ كوڭىل كونشىتپەي وتىرعانىن ايتقان بولاتىن. وسىعان وراي، شەتەلدەن كوشىپ كەلگەن قانداسىمىز كوپبالالى وتباسى ەرجان باقىتتىڭ شاڭىراعىنداعى جاع­دايدى قىسقاشا بايانداي كەتەيىك.

ەرجان باقىت – 1992 جىلى 3 جاسىندا موڭعوليا ەلىنەن تاريحي وتانى قا­زاق­ستانعا كوشىپ كەلگەن. قازاق ەلىندە ءبىلىم الىپ، وتباسىن قۇراپ، تاۋەلسىز ەلدىڭ ازا­ماتى اتاندى. 2011 جىلى الما الدا­نىشقىزىمەن ۇيلەنىپ، وتاۋ كوتەرگەن. قازىر ەرجان مەن المانىڭ اقمارال، اقبوتا، ايارۋ ەسىمدى سۇيكىمدى ءۇش قىزى بار. ءۇش قىزدان كەيىن بيىل ومىرگە بۇل شاڭىراققا ۇشەم دۇنيەگە كەلدى. ۇشەمدەر بيىل 28 شىلدەدە دۇنيەگە كەلگەن. ەسىمدەرى ايتۋعان، كۇنتۋعان جانە نۇرتۋعان. ەرجان مەن المانىڭ شاڭىراعى شاتتىققا بولەدى. ارينە، بۇل ءبىر وتباسىنىڭ عانا جە­كە قۋانىشىمى بولعانىمەن، سيرەك كەزدەسەتىن وقيعا.

سوناۋ موڭعوليا ەلىنەن كوشىپ كەلگەن قانداسىمىز بۇل كۇندە التى بالاسىن ارقالاپ پاتەردەن پاتەر جاعالاپ ءجۇر­گەنىن دە جاسىرمادى. ولار ۇل-قىزدارىن تاربيەلەپ ءوسىرۋ ءۇشىن ءبىر باسپانا بولسا دەگەن تىلەگىن دە ايتتى. قانداستاردىڭ ەندىگى ۇكىلى ءۇمىتى نۇر-سۇلتان قالاسىنىڭ اكىمدىگىندە ەكەنىن ايتادى.

 

سوڭعى جاڭالىقتار