15 قىركۇيەك, 15:49 409 0 مادەنيەت انار لەپەسوۆا

اسحات ماەميروۆ جاڭا قىزمەتكە تاعايىندالدى

اسحات ماەميروۆ ەلوردادا اشىلعان مەملەكەتتىك مۋزىكالىق بالالار مەن جاسوسپىرىمدەر تەاترىنا ديرەكتور بولىپ تاعايىندالدى. بۇل تۋرالى تەاتردىڭ ءباسپاسوز قىزمەتى حابارلادى.

اسحات ماكسيمۇلى ماەميروۆ - ەلىمىزگە تانىمال تەاتر رەجيسسەرى، قازاقستاننىڭ ەڭبەك سىڭىرگەن قايراتكەرى، ونەرتانۋ PhD دوكتورى، پروفەسسور، «بولاشاق» حالىقارالىق ستيپەندياسىنىڭ تۇلەگى.

ا.س.پۋشكين اتىنداعى ورال پەداگوگيكالىق ينستيتۋتىنىڭ فيلولوگيا فاكۋلتەتىن جانە ت.جۇرگەنوۆ اتىنداعى قازاق ۇلتتىق ونەر اكادەمياسىن تەاتر رەجيسسەرى ماماندىعى بويىنشا ۇزدىك اياقتاعان.

2008 جىلى «بولاشاق» حالىقارالىق ستيپەندياسىمەن سوربوننا ۋنيۆەرسيتەتىندە جانە پاريج ۇلتتىق ونەر كونسەرۆاتورياسىندا ءبىلىمىن جەتىلدىردى. 2010 جىلى رەسەي تەاتر ونەرى اكادەمياسىنىڭ (گيتيس) ماگيستراتۋراسىن ءتامامدادى.

2016 جىلى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ عىلىمي كەڭەسىندە «قازاقستاننىڭ تەاتر رەجيسسۋراسىنداعى ساباقتاستىق پەن جاڭاشىلدىق» تاقىرىبىندا دوكتورلىق ديسسەرتاتسياسىن قورعاپ، ونەرتانۋ بويىنشا فيلوسوفيا دوكتورى عىلىمي دارەجەسىنە يە بولدى.

ەڭبەك جولىن 1997 جىلى باتىس قازاقستان وبلىستىق قازاق دراما تەاترىندا قويۋشى-رەجيسسەر بولىپ باستادى. ءار جىلدارى «قازاقستاننىڭ رۋحاني دامۋ قورى» اق ۆيتسە-پرەزيدەنتى، قر مادەنيەت جانە سپورت مينيسترلىگىنىڭ جانىنداعى «قازاق اۋەندەرى» اق پرەزيدەنتى بولىپ قىزمەت ەتتى.

ەلىمىزدە تۇڭعىش رەت اشىلعان «Astana Musical» مەملەكەتتىك تەاترىنا كوركەمدىك جەتەكشىلىك جاسادى. «قازاقكونتسەرت» مەملەكەتتىك كونتسەرتتىك ۇيىمىنىڭ باس ديرەكتورى، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى قىزمەتتەرىن اتقاردى. ا.ماەميروۆ 2018-2019 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولدى. وسى ۋاقىتقا دەيىن ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ديرەكتورى بولىپ ەڭبەك ەتتى.

اسحات ماەميروۆ مەملەكەتتىك جانە حالىقارالىق اۋقىمداعى سەكسەننەن استام مادەني ءىس-شارانىڭ رەجيسسەرى بولدى. قازاقستاننىڭ تەاتر ساحنالارىندا جيىرمادان استام قويىلىمدى ساحنالاپ، رەسپۋبليكالىق جانە حالىقارالىق ونەر فەستيۆالدەرىنىڭ بىرنەشە مارتە لاۋرەاتى اتاندى. سونىڭ ىشىندە م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىندا – ا.چەحوۆتىڭ «ۆانيا اعاي»، ا.ءۆولوديننىڭ «قوشتاسقىم كەلمەيدى»، م.وماروۆانىڭ «اقتاستاعى احيكو»، ب.بەدەلحاننىڭ «ۇلىم، ساعان ايتام» قويىلىمدارىن، ع. مۇسىرەپوۆ اتىنداعى قازاقتىڭ مەملەكەتتىك اكادەميالىق بالالار مەن جاسوسپىرىمدەر تەاترىندا - گ. حۋگاەۆتىڭ «قارا شەكپەن» ءافسانا-دراماسىن، «استانا وپەرا» مەملەكەتتىك وپەرا جانە بالەت تەاترىندا – م.تولەباەۆتىڭ «ءبىرجان-سارا» وپەراسىن، ە.برۋسيلوۆسكي، ع.مۇسىرەپوۆتىڭ «قىزجىبەك» وپەراسىن، «Astana Musical» مەملەكەتتىك تەاترىندا - ج.پرەسگۋرۆيكتىڭ «رومەو مەن دجۋلەتتا»، ا.ورەنبۋرگسكيدىڭ «استانا – مەنىڭ ماحابباتىم»، «ءشامشى» جانە «قىزجىبەك» ەتنو-فولكلورلىق ميۋزيكلدەرىن ساحنالادى.

ساحنالاعان قويىلىمدارى ارقىلى جاپونيا، فرانتسيا، اۆستريا، گەرمانيا، بەلگيا، چەحيا، يزرايل، رەسەي، تۇركيا، گرۋزيا، ارمەنيا ت.ب. مەملەكەتتەردە وتكەن حالىقارالىق فەستيۆالدەر مەن فورۋمداردا قازاقتىڭ تەاتر ونەرىن شەتەلدىك كورەرمەندەرگە پاش ەتتى.

سوڭعى جاڭالىقتار