15 قىركۇيەك, 14:31 539 0 زاڭ انار لەپەسوۆا

الماتى وبلىسىندا 200-دەن اسا ادام Qnet كومپانياسىنىڭ قۇرىعىنا ىلىنگەن

ەلىمىزدە Qnet جەلىلىك كومپانياسىنا قاتىستى 29 قىلمىستىق ءىس قارالۋدا. بۇل تۋرالى قر ءىىم تەرگەۋ دەپارتامەنتىنىڭ باسشىسى سانجار ءادىلوۆ ونلاين بريفينگ بارىسىندا مالىمدەدى.  

دەپارتامەنت باسشىسىنىڭ دەرەگىنشە، Qnet كومپانياسىنىڭ باس كەڭسەسى مالايزيادا ورنالاسقان. كومپانيا جەلىلىك ماركەتينگ جۇرگىزەدى، وندا ادامدار ءتۇرلى زەرگەرلىك بۇيىمداردى ساتۋمەن اينالىسادى. باستاپقى سالىم سوماسى – 30 دوللار. قازىرگى ۋاقىتتا ازاماتتاردان اتالعان كومپانياعا قاتىستى 211 شاعىم تىركەلگەن. جالپى ەلىمىز بويىنشا 29 قىلمىستىق ءىس تەرگەلۋدە. 

س. ءادىلوۆ الماتى وبلىسى پوليتسيا دەپارتامەنتىنىڭ تەرگەۋ باسقارماسى Qnet كومپانياسىنىڭ وكىلدەرىنە قاتىستى 20 قىلمىستىق ءىستى تەرگەپ جاتقانىن ايتتى.

«الماتى وبلىسىندا 220 ادامنىڭ زادراپ شەككەنى انىقتالدى. ولار 160 ملن تەڭگە ماتەريالدىق شىعىنعا ۇشىراعان. تەرگەۋ شارالارى بەلسەندى ءجۇرىپ جاتىر. مالايزيا كورولدىگىنە حالىقارالىق تەرگەۋ تاپسىرماسى جىبەرىلدى. اتالعان قىلمىستىق ءىس ناتيجەلەرى تۋرالى قوسىمشا حابارلايمىز»، - دەدى دەپارتامەنت باسشىسى. 

 

سوڭعى جاڭالىقتار