15 قىركۇيەك, 13:46 4110 0 ءبىلىم انار لەپەسوۆا

مينيستر ۇبت كەزىندەگى بىلىقتاردى جايىپ سالدى

ۇبت-عا قاتىسۋ ەرەجەلەرىن قاتاڭداتۋ ارقاسىندا بيىل تىيىم سالىنعان زاتتاردى ەمتيحانعا الىپ كىرەتىندەدىڭ سانى 70 ەسەگە ازايعان. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى. 

جاڭا ەرەجە بويىنشا بيىل تىيىم سالىنعان زاتتارمەن ۇستالعاندار عانا ەمەس، ونى الىپ كىرۋگە ارەكەت ەتكەندەر دە ەمتيحانعا قاتىسۋ مۇمكىندىگىنەن ايرىلدى.

"بۇرىن مەتالل ىزدەگىش قۇرالدار ارقىلى تەكسەرۋ كەزىندە تەلەفون تابىلسا، ونى الىپ قالاتىن ەدىك، بىراق تالاپكەر تەستىلەۋگە قاتىسا بەرەتىن. مۇنداي ەرەجە كەزىندە ءتارتىپ بۇزۋشىلار سانى ەلىمىز بويىنشا 100-150 مىڭنان اساتىن. تالاپكەر ەمتيحاندا تەلەفونمەن ۇستالعان كۇننىڭ وزىندە ونى قولدانىپ ۇلگەرگەنىن دە دالەلدەۋ كەرەك بولعان. بۇل جاعداي ۇبت-نى وتكىزۋ راسىمىنە دەگەن سەنىمسىزدىككە اكەپ سوقتىردى", - دەپ جازدى مينيستر Facebook-تەگى پاراقشاسىندا.

اسحات ايماعامبەتوۆتىڭ ايتۋىنشا، ۇبت وتكىزۋ تالاپتارىنىڭ قاتاڭداتىلۋى ناتيجەسىندە ورتاشا ۇپاي تومەندەدى، پايىزدىق مولشەردە شەكتى بالل جيناعان تالاپكەرلەردىڭ سانى ەداۋىر ازايدى. الايدا بۇل قادام تەستىلەۋدىڭ ءادىل ءوتۋى ءۇشىن جاسالىپ وتىر.

سونداي-اق، بيىل  ۇبت-نى وتكىزۋ ەرەجەلەرىن بۇزعانى نەمەسە جۇمىستى ناشار ۇيىمداستىرعانى ءۇشىن 20-دان استام كوميسسيا مۇشەلەرى مەن باسشىلارى جازالاندى.

"كۇن سايىن تەست تاپسىرۋ پۋنكتەرىندە كوميسسيالاردىڭ قۇرامىن وزگەرتىپ، مىندەتىنە نەمقۇرايلى قاراعان مامانداردى اۋىستىرۋعا نەمەسە جۇمىستان شەتتەتۋگە تۋرا كەلدى. وعان قوسا، بىرنەشە پۋنكتە جاپپاي زاڭبۇزۋشىلىقتاردىڭ اشىق جانە ورەسكەل تۇردە ورىن الۋىنا بايلانىستى تەستىلەۋدى مۇلدەم توقتاتۋعا جانە باسقا كۇندەرگە اۋىستىرۋعا ءماجبۇر بولدىق. مۇنداي جاعداي شىعىس قازاقستان مەن تۇركىستان وبلىستارىندا كەزدەستى. دەگەنمەن، قاجەتتى ءتارتىپتى قامتاماسىز ەتە الدىق", - دەيدى مينيستر.

ەسكە سالا كەتەيىك، بۇعان دەيىن ءبىلىم جانە عىلىم ءمينيسترى 2021 جىلى ۇبت بازاسى تولىق جاڭارتىلاتىنىن مالىمدەگەن ەدى.

اسحات ايماعامبەتوۆتىڭ سوزىنشە، سوڭعى بىرنەشە جىلدا تەستىلەۋ سۇراقتارىنىڭ بازاسىن جاڭارتۋ بويىنشا جۇمىس جۇرگىزىلگەندىگىنە قاراماستان سۇراقتاردىڭ باسىم بولىگى ءالى دە قاجەتسىز فاكتىلەردى جاتتاپ، ەستە ساقتاۋعا باعىتتالعان. بۇدان بىلاي فۋنكتسيونالدىق ساۋاتتىلىققا ءمان بەرىلمەك. ول ءۇشىن مينيسترلىك ۇبت بازاسىن SAT, PISA سەكىلدى تەستەردىڭ ۇلگىسى بويىنشا تولىق جاڭارتۋ ماسەلەسىن قولعا الادى.

 

سوڭعى جاڭالىقتار