15 قىركۇيەك, 13:24 389 0 رۋحانيات انار لەپەسوۆا

قوستانايدا 1939 جىلى لاتىن قارپىندە جارىق كورگەن اباي ولەڭدەرىنىڭ جيناعى تابىلدى

كىتاپتى العاش قر ىشكى ىستەر مينيستىرلىگىنە قاراستى شىراقبەك قابىلباەۆ اتىنداعى قوستاناي اكادەمياسىنىڭ قىزمەتكەرى مىرزابەك تۇيعانوۆ جۇمىس ورنىنا اكەلىپ، ارىپتەستەرىنە تانىستىرعان، دەپ حابارلايدى قازاقپارات. 

«قۇندى ەڭبەك ماعان ناعاشى اتامنىڭ ءىنىسى، مارقۇم سەرەمەت اسىلبەكۇلىنان مۇرا بولىپ قالعان. ول كىسى كىتاپتى كوپ وقيتىن جانە سيرەك شىعارىلاتىن شىعارمالاردى ءجيى جينايتىن ەدى. جاس كەزىمدە اۋىلعا ءبىر بارعانىمدا ناعاشىم وسى لاتىن قارىپىندە جارىق كورگەن ابايدىڭ ولەڭدەر جيناعىن سىيعا تارتقان بولاتىن. سول ۋاقىتتان بەرى كىتاپ مەنىڭ ۇيىمدە ساقتالىپ كەلدى. بيىل ۇلى ابايدىڭ تۋعانىنا 175 جىل، وعان قوسا ەلباسى ن.ءا.نازارباەۆتىڭ باستاماسىمەن ەلىمىزدە لاتىن الىپبيىنە كوشۋ جۇمىستارى جۇرگىزىلۋدە. سوندىقتان، كىتاپتى ۇيدە ساقتاعانشا، ونىمەن ارنايى ءتىل ماماندارى تانىسىپ، زەرتتەسىن دەگەن نيەتپەن تانىستىرىپ وتىرمىن، - دەدى كىتاپ يەسى مىرزابەك تۇيعانوۆ.

كىتاپتىڭ العى ءسوزىن ءسابيت مۇقانوۆ جازعان. قۇندى ەڭبەككە ۇلى اقىننىڭ ولەڭدەرىمەن قاتار «ەسكەندىر»، «ءازىم اڭگىمەسى»، «ماسعۇت» پوەمالارى ەنگەن.

«اباي ولەڭدەرى توپتاستىرىلعان كىتاپ نەگىزى ەكى توم بولىپ جارىققا شىققان. تابىلعان سونىڭ ءبىرىنشى تومى. ەكىنشى تومى 1940 جىلى مۇحتار اۋەزوۆتىڭ العى سوزىمەن جارىق كورگەن ەكەن. كىتاپتىڭ سىرتقى مۇقاباسى توزعان، العاشقى بەتىندەگى العى سوزدەردەن بىرنەشە بەت جانە سوڭىنداعى تۇسىنىكتەمەلەردەن بىرنەشە بەت جوعالعان. ال قالعان ولەڭدەر مەن پوەمالارى تولىق ساقتالعان»، - دەدى شىراقبەك قابىلباەۆ اتىنداعى قوستاناي اكادەمياسى كوممۋنيكاتسيا ءبولىمىنىڭ باسشىسى قۇربانالى ەرمۇراتوۆ.

مىرزابەك تۇيعانوۆ كىتاپتى قر ىشكى ىستەر مينيستىرلىگىنە قاراستى شىراقبەك قابىلباەۆ اتىنداعى قوستاناي اكادەمياسىنىڭ مۇراجايىنا تابىستاعان.

ايتا كەتەيىك، اكادەميا مۇراجايىندا بۇعان دەيىن مۇحتار اۋەزوۆتىڭ دومبىراسى، سونىمەن قاتار شىراقبەك قابىلابەۆتىڭ جەكە بۇيىمدارى مەن قولجازبالارى ساقتالعان.

 

سوڭعى جاڭالىقتار