14 تامىز, 15:51 465 0 جاڭالىقتار اسىل تۇمار

ساياسي ەليتادا گەندەرلىك ترانسفورماتسيانىڭ جاڭا كەزەڭى باستالدى – ءنازيلا راززاق

«Nur Otan» پارتياسى توراعاسىنىڭ ءبىرىنشى ورىنباسارىنىڭ كەڭەسشىسى ءنازيلا راززاق كاسىپكەر ايەلدەرمەن، ءتۇرلى كومپانيالاردىڭ توپ-مەنەدجەرلەرىمەن جانە ۇكىمەتتىك ەمەس ۇيىم وكىلدەرىمەن ونلاين-كونفەرەنتسيا وتكىزىپ، 17 تامىز كۇنى باستالاتىن پرايمەريز تۋرالى وي ءبولىستى. ول كونفەرەنتسيا بارىسىندا ايەلدەر قاۋىمىن قىزىقتىرعان سۇراقتارعا جاۋاپ بەرىپ، پرايمەريز ەرەجەلەرىنە توقتالدى.

الداعى پرايمەريزدە ايەلدەر مەن جاستارعا باسىمدىق بەرىلگەنىن اتاپ وتكەن ن.راززاق قازاقستاننىڭ ساياسي ەليتاسىندا گەندەرلىك ترانسفورماتسيا باستالدى دەپ ءمالىم ەتتى.

«ساياسي ەليتادا گەندەرلىك ترانسفورماتسيانىڭ جاڭا كەزەڭى باستالدى. الداعى پرايمەريزدە ەلىمىزدەگى ايەلدەر قۇقىعى مەن ولاردىڭ زاڭدىق قىزىعۋشىلىقتارىن قورعاۋ ماقساتىندا بارشاڭىزدىڭ بەلسەندىلىك تانىتۋلارىڭىزدى سۇرايمىن. زاماناۋي قوعامدا ايەلدەر انا جانە ايەل بولىپ قانا ەمەس، كاسىبي سالاسىندا بەلگىلى ءبىر قىزمەتتى اتقارعىسى كەلەدى. ەلىمىزدەگى ايەلدەردىڭ ساياسي بەلسەندىلىكتەرى ءوسىپ جاتىر. ايەلدەر ەرلەرمەن بىرگە باسشىلىق قىزمەتتەردى قاتار اتقارىپ ءجۇر. بۇگىنگى تاڭدا پارتيادا 800 مىڭداي ادام تىركەلگەن، ولاردىڭ قاتارىنداعى ايەلدەر سانى از ەمەس. ايەلدەر بۇگىنگى تاڭدا وزدەرىنىڭ پروبلەمالارىن قوعامدا اشىق ايتىپ، ونى شەشۋگە دايىن ەكەندەرىن كورسەتىپ ءجۇر. پرايمەريزدە باق سىنايتىن ايەلدەردىڭ ۇلەس سالماعى 30%-دان كەم بولمايدى دەپ ويلايمىن»، – دەدى ءنازيلا راززاق.

سوڭعى ءۇش جىلدا ەلىمىزدەگى وتباسى پروبلەمالارى مەن بالا قۇقى، ايەلدەر قۇقى، مۇمكىندىگى شەكتەۋلى جانداردىڭ ماسەلەلەرىمەن اينالىسىپ جۇرگەن قوعام بەلسەندىسى سالتانات پارحاتوۆنا سايلاۋداعى داۋىس بەرۋ پروتسەسىن جەڭىلدەتۋگە قاتىستى ءوز ۇسىنىسىن ايتتى.

«سايلاۋدا كوپ جاعدايدا بەلسەندىلىكتى زەينەتكەرلەر، ومىرلىك تاجىريبەسى بار ەرەسەكتەر تانىتىپ جاتادى. بىراق اۋىلدىق جەردەگى ادامداردا قاراپايىم عانا كومپىيۋتەر نەمەسە ۇيالى تەلەفون جوق، كوپشىلىگى ەلكەتروندى فورماتتا قالاي جۇمىس ىستەۋدى بىلمەيدى. ياعني تىركەلۋدىڭ ءوزى ولار ءۇشىن قيىن پروتسەدۋرا. بۇل داۋىس بەرۋشىلەرگە ىڭعايسىزدىق تۋدىرادى. سول سەبەپتى مۇمكىندىك بولسا مەن ايتقان كاتەگورياداعى ادامدار ءۇشىن دۇكەندەر، ايالدامالاردا داۋىس بەرۋدى ارنايى نۇسقاۋلىقتار تاراتۋ ارقىلى تۇسىندىرسەك. سونداي-اق، ەلەكتروندى داۋىس بەرۋ پروتسەدۋرالارىن بارىنشا جەڭىلدەتۋدى قاراستىرساڭىزدار»، – دەپ اتاپ ءوتتى پارحاتوۆنا.

كونفەرەنتسياعا قاتىسقان رەسپۋبليكالىق نوتارياتتار پالاتاسىنىڭ ءتورايىمى اسەل ءجانابىلوۆا پرايمەريزدىڭ ينتەرنەت-رەسۋرستار ارقىلى كەڭىنەن ناسيحاتتالىپ جاتقانى ءۇشىن پارتيا وكىلدەرىنە العىسىن ايتتى. ول سونداي-اق، قازىرگى دەپۋتاتتاردىڭ وزدەرى دە پرايمەريزگە قاتىسۋعا قىزىعۋشىلىق تانىتىپ، قامدانىپ جاتقانىن مالىمدەدى.

ءبىر ساعاتتىق جيىن بارىسىندا ايەلدەر قاۋىمداستىعىنىڭ مۇشەلەرى پرايمەريزدەگى داۋىس بەرۋدىڭ شىنايىلىعى، تەحنيكالىق مۇمكىندىكتەر مەن ءتۇسىندىرۋ جۇمىستارىن تالقىلاپ، ءوز ۇسىنىستارىن ءبىلدىردى.

سوڭعى جاڭالىقتار