14 تامىز, 15:02 410 0 جاڭالىقتار اسىل تۇمار

جاس عالىمدار «Nur Otan» پارتياسىنىڭ پرايمەريز وتكىزۋ باستاماسىن قولدايدى

13 تامىزدا ەلىمىزدىڭ جاس عالىمدارى ZOOM – كونفەرەنتسيا وتكىزدى. كونفەرەنتسيا بارىسىندا ءتۇرلى سالانىڭ جاس عالىمدارى «Nur Otan» پارتياسىنىڭ پرايمەريزىن وتكىزۋ باستاماسىن قولدايتىنىن جانە پرايمەريز تۋرالى عىلىمي جۇمىستار جاساۋعا دايىن ەكەنىن مالىمدەدى.

ZOOM-كونفەرەنتسياعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ دوتسەنتى ينديرا رىستينا، «بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسينوۆا، ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ كارديوحارۋرگيا ءبولىمىنىڭ مەڭگەرۋشىسى باۋىرجان راكيشەۆ، مەملەكەتتىك ساياسات جوعارى مەكتەبى تۇلەكتەرى قاۋىمداستىعىنىڭ پرەزيدەنتى ماناسوۆ جانگەلدى، ۇلتتىق بيوتەحنولوگيا ورتالىعىنىڭ ءبولىم مەڭگەرۋشىسى ماقسات جاباعين، جاس عالىمدار اليانسىنىڭ توراعاسى ءاسيا ەرمۇحامبەتوۆا جانە مۇشەلەرى، «Nur Otan» پارتياسى ورتالىق اپپاراتى ساياسي جۇمىستار دەپارتامەنتىنىڭ ديرەكتورى ەرلان قارابالاەۆ قاتىستى.

اتالعان جيىندى STEM اكادەمياسىنىڭ نەگىزىن قالاۋشى ءابۋتالىپ ءمۇتالى جۇرگىزدى. ءابۋتالىپ ءمۇتالى بۇگىندە جاس عالىمداردى قىزىقتىراتىن جانە پرايمەريزگە قاتىسۋ بويىنشا بىرقاتار ءجيى قويىلاتىن سۇراقتاردى اتاپ ءوتتى.

كونفەرەنتسيا بارىسىندا، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ دوتسەنتى، PhD دوكتور ينديرا رىستينا ساياساتتانۋ ماماندىعىنداعى ءبىلىم الۋشىلار قازاقستاندا العاش رەت وتكىزىلەتىن پرايمەريز تۋرالى عىلىمي جۇمىستار ازىرلەۋگە قىزىعۋشىلىق تانىتىپ وتىرعانىن ايتتى.

«پرايمەريز – قازاقستاندا تۇڭعىش رەت ۇيىمداستىرىلىپ جاتقان شارا بولعاندىقتان بىزگە، بۇل ءۇردىس قىزىقتى. جاڭا وقۋ جىلىندا وقۋعا تۇسكەن ماگيسترانتتار، ديپلوم جازاتىن باكالاۆر ستۋدەنتتەرى پرايمەريزدى كەيس رەتىندە قاراستىرىپ، عىلىمي زەرتتەۋ جۇمىستارىن جۇرگىزەدى. سول كەزدە بىزگە پارتيانىڭ قولداۋى كەرەك بولادى. سوندىقتان وسى ناۋقاننىڭ ماتەريالدارىمەن ءبولىسىپ وتىرساڭىزدار دەگەن ءوتىنىشىمىز بار»، –دەدى ينديرا رىستينا.

ول سونىمەن قاتار پارتيامەن بىرىگىپ، «ساياسي تەحنولوگ» اتتى ماگيستراتۋرا دەڭگەيىندەگى ءبىلىم بەرۋ باعدارلاماسىن قۇرۋدى ۇسىندى.

«Nur Otan» پارتياسىنىڭ ورتالىق اپپاراتى ساياسي جۇمىستار دەپارتامەنتىنىڭ ديرەكتورى ەرلان قارابالاەۆ «Nur Otan» پارتياسىنىڭ ورتالىق اپپاراتىندا قىزمەت ەتەتىن ساياساتتانۋشى، الەۋمەتتانۋشى عالىمدار جاڭا ءبىلىم بەرۋ باعدارلاماسىنا ارالاسىپ، بىرلەسە جۇمىس ىستەۋگە جانە ماگيسترانتتار مەن ستۋدەتتەردىڭ عىلىي جۇمىستارى ءۇشىن ماتەريالدار ۇسىنۋعا دايىن ەكەنىن جەتكىزدى.

سونىمەن قاتار، ول قاتىسۋشىلارعا پرايمەريزدىڭ ەرەجەلەرىن، ەرەكشەلىكتەرىن ءتۇسىندىرىپ بەردى.

«پرايمەريز ماقساتى – جەرگىلىكتى جەردەگى، اۋىلداعى، قالاداعى پروبلەمالاردى ناقتى بىلەتىن جانە قوعام بىلەتىن، تانيتىن ليدەرلەردى انىقتاۋ. ءبىر ەرەكشەلىك – ءماسليحات سايلاۋلارى كەلەر جىلى ءبىرىنشى رەت پروپورتسيونالدىق جۇيە بويىنشا وتەدى. سايلاۋشىلار پارتيالىق تىزىمگە داۋىس بەرەدى»، – دەدى ە.قارابالاەۆ.

كونفەرەنتسيادا «بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆا بولاشاق تۇلەكتەرى، قازاقستاننىڭ تۇكپىر-تۇكپىرىنەن پرايمەريزگە بەلسەندى قاتىسۋعا نيەت تانىتىپ وتىرعانىن حابارلادى.

ەستەرىڭىزگە سالا كەتەيىك، جالپىرەسپۋبليكالىق «Nur Otan» پارتياسىنىڭ پرايمەريزى 2020 جىلدىڭ 17 تامىزى مەن 3 قازانى ارالىعىندا وتەدى. پرايمەريزدىڭ نەگىزگى ماقساتى پارتيالىق تىزىمدەردى باسەكەلەستىك جانە اشىق نەگىزدە قالىپتاستىرۋ.

سوڭعى جاڭالىقتار