14 تامىز, 09:57 915 0 جاڭالىقتار اسىل تۇمار

قىزىلوردا وبلىسىندا تويحانالار ءوندىرىس ورىندارىنا اينالۋدا

قىزىلوردا وبلىسى قارماقشى اۋدانىندا تويحانالار ءوندىرىس ورنىنا اينالا باستادى.

قارماقشى اۋدانىنداعى 3 تويحانا يەسى بيزنەستەگى باعىتىن وزگەرتتى. اۋدانعا قاراستى ءدۇر وڭعار اۋىلىندا تەمىربەتون ونىمدەرىن شىعاراتىن تسەح اشىلدى. سول ارقىلى اۋىل ازاماتتارى ەڭبەكپەن قامتىلدى. قۇرىلىس ماتەريالدارىن وندىرۋگە جول اشىلدى.

«اۋىلدا سۋعا سالاتىن كىشى جانە ۇلكەن لوتوكتارعا سۇرانىس زور. سونداي-اق، ءبىز قابىرعا تاقتاسىن دا شىعارىپ جاتىرمىز»، – دەدى سەرىكتەستىك ديرەكتورىنىڭ ورىنباسارى ورالباي ماشاراپوۆ.

اۋىل تۇرعىنى ەرسىن وتەەۆ تە ءوز كاسىبىن ءارتاراپتاندىرۋدى كوزدەپ وتىر. ول شەگە، تور، تىكەن سىم سىندى اۋىل شارۋاشىلىعىنا قاجەتتى ءونىم تۇرلەرىن شىعاراتىن قۇرىلعى ساتىپ العان. ول ءۇشىن مەملەكەتتىك قولداۋ اياسىندا جەڭىلدەتىلگەن نەسيە العان.

جالپى، قارماقشى اۋدانىندا قۇنى 28 ميلليون تەڭگەنى قۇرايتىن 4 جوبا «قاراپايىم زاتتار ەكونوميكاسى» اياسىندا جۇزەگە اسقان.

«جىل باسىنان بەرى 54 كاسىپكەر 296 ميلليون تەڭگە كولەمىندە نەسيە الىپ، ءوز كاسىبىن دوڭگەلەنتە ءتۇستى. قازىر اۋداندا 27 كىشى تسەح اشىلدى»، – دەدى قارماقشى اۋدانىنىڭ اكىمى مۇسا قالداربەكوۆ.

كارانتين كەزىندە بۇرىن تويحانا بيزنەسىمەن اينالىسقان كاسىپكەرلەر قاتارىندا ءىسىن جاڭا باعىتقا بۇرعان كاسىپكەرلەر سانى ارتتى. ولاردىڭ ءبىرى ءتۇشپارا ازىرلەيتىن تسەح اشۋعا نيەت بىلدىرسە، ەندى ءبىرى قۇس شارۋاشىلىعىن اشۋعا بەتبۇرىس جاساۋ ماقساتىندا ارنايى جوبا دايىنداۋدا.

«تاعى ءبىر تويحانا يەسى جەلىلىك دۇكەن اشۋعا نيەت ءبىلدىردى. وعان قوسا، كەنتتەگى تويحانا قوناق ءۇي ەسەبىندە پايدالانىلۋدا»، – دەدى قارماقشى اۋداندىق كاسىپكەرلىك ءبولىمىنىڭ باسشىسى ەركەبۇلان ابدىكەروۆ.

سوڭعى جاڭالىقتار