13 تامىز, 19:18 475 0 ءبىلىم ارايلىم بيمەنديەۆا

الماتى وبلىسىندا ءبىلىم سالاسىن تسيفرلاندىرۋ قارقىنى ارتتى

الماتى وبلىسىنىڭ اكىمى اماندىق باتالوۆ ءبىلىم سالاسىنداعى مالىمەتتەرمەن ءبولىستى. الماتى وبلىسىندا 41 625 پەداگوگ جۇمىس ىستەيدى، ولاردىڭ بارلىعى كومپيۋتەرلىك تەحنيكامەن قامتىلعان، 40 165  مۇعالىم نەمەسە 96,4% ينتەرنەتكە قوسىلعان، 3,6% قوسىلماعان، كادر تاپشىلىعى – 498.

– تسيفرلاندىرۋ بۇگىنگى دامۋ پروتسەسىنە ەرەكشە اسەر ەتىپ وتىر. بۇل تالاپ بۇگىنگى جاعدايدا بارلىق سالاعا ەنگىزىلۋدە. سونىڭ ىشىندە ءبىلىم بەرۋ سالاسى دا بۇل جۇمىستان تىس قالعان جوق. Bilimland.kz ساندىق رەسۋرسى وبلىستاعى 737 (97%) مەكتەپتە قولجەتىمدى. كەڭ جولاقتى ينتەرنەتكە 752 (98%) مەكتەپ، «كۇندەلىك» جۇيەسىنە 704 (95%) مەكتەپ قوسىلعان، – دەپ اتاپ ءوتتى ا. باتالوۆ.

وبلىس اكىمىنىڭ ايتۋىنشا، 732 ەلدى مەكەننىڭ 19-ىندا  ينتەرنەت جەلىسى جوق، ونداعى مەكتەپ جاسىنداعى 886 بالانىڭ 730-ى تەلەارنا ارقىلى، قالعان 156 بالا شتاتتىق رەجيمدە وقىتىلاتىن بولادى. «قازاقتەلەكوم» اق ارقىلى 98 مەكتەپتە ينتەرنەت جىلدامدىعىن 4 مبيت-تەن 8 مبيت-كە  دەيىن ۇلعايتىلماق. سونداي-اق، ينتەرنەت جەلىسىنە قوسىلۋ ءۇشىن وقۋشىلارعا 43 مىڭ روۋتەرلار ساتىپ الۋ جوسپارلانىپ وتىر. جالپى الماتى وبلىسىندا جاڭا وقۋ جىلىندا بالالاردى كومپيۋتەر جانە ينتەرنەت جەلىسىمەن قامتۋ ماسەلەلەرىن شەشۋ ءۇشىن بارلىق جاعداي جاسالۋدا.

سوڭعى جاڭالىقتار