13 تامىز, 17:12 481 0 قوعام انار لەپەسوۆا

الماتىدا قۇرىلىس كومپانياسىنىڭ ەكى قوناقۇيى اۋرۋحاناعا اينالادى

RAMS قۇرىلىس كومپانياسى ءوزىنىڭ ەكى قوناقۇيىن كوروناۆيرۋستى ەمدەيتىن اۋرۋحاناعا اينالدىرۋعا دايىن. بۇل تۋرالى الماتى قالاسىنىڭ اكىمى باقىتجان ساعىنتاەۆ ايتتى.

"RAMS قۇرىلىس كومپانياسى ءوزىنىڭ ەكى قوناقۇيىن قاۋىپتى ىندەتتى ەمدەيتىن اۋرۋحاناعا اينالدىرىپ، COVID-19-عا قارسى ءىس-قيمىلعا ۇلەس قوسپاقشى. جالپى سىيىمدىلىعى 215 توسەك-ورىن، ونىڭ ىشىندە 34 قارقىندى تەراپيا مەن رەانيماتسيا بار. باقىلاۋ مەن سۇرىپتاۋ بوكستارى، وتا جاساۋ جانە ەمحانالىق بولىمشەلەر قاراستىرىلعان", - دەپ جازدى اكىم Instagram پاراقشاسىندا جازدى.

باقىتجان ساعىنتاەۆتىڭ ايتۋىنشا، بارلىق ءۇي-جايلار بولەك كىرەتىن جانە زارارسىزداندىرۋ جۇيەلەرى بار ءۇش ايماققا بولىنەدى. تازا اۋا اينالىمى ءۇشىن تەرىس قىسىمى بار جۇيە قاراستىرىلعان. بۇل پەرسونالدىڭ جۇقتىرۋ قاۋپىن ازايتادى.

"گوسپيتالدار زاماناۋي جابدىقتارمەن، سونىڭ ىشىندە كت جانە رەنتگەن اپپاراتتارىمەن، ۋدز، ءوجج، سونداي-اق مەديتسينالىق گازدار جۇيەسىمەن جابدىقتالادى. تۇركيادان كەلەتىن دارىگەرلەردى قوسا العاندا، مەديتسينالىق قىزمەتكەرلەر قۇرامى دايىن. مۇنداعى تاعى ءبىر ەرەكشەلىك، 90 مينۋتتىڭ ىشىندە كۆي-تەستىنىڭ ناتيجەلەرىن الۋعا مۇمكىندىك بەرەتىن جەكە پتر زەرتحانالارى بار. قۇرىلىس-مونتاج جۇمىستارى اياقتالعاننان كەيىن گوسپيتالداردى 1 قازانعا دەيىن اشۋ جوسپارلانۋدا", - دەدى شاھار باسشىسى.

ەسكە سالا كەتەيىك، بۇعان دەيىن باقىتجان ساعىنتاەۆ قالادا ەكىنشى ەكىنشى ءمودۋلدى اۋرۋحانا قۇرىلىسى باستالعانىن مالىمدەگەن. ونىڭ ايتۋىنشا, جاڭا اۋرۋحانا 300 توسەك-ورىنعا ارنالعان، ونىڭ 30-ى – رەانيماتسيالىق ورىن.

سونداي-اق، قالا اكىمى كوروناۆيرۋستىڭ كۇزدەگى جاڭا تولقىنىندا ورىن تاپشىلىعى بولماس ءۇشىن 7 700 پاتسيەنتكە ورىن دايىندالاتىنىن ايتتى.

سوڭعى جاڭالىقتار