13 تامىز, 13:36 464 0 جاڭالىقتار انار لەپەسوۆا

«Nur Otan»: پرايمەريزدىڭ رەسپۋبليكالىق كۇنتىزبەلىك جوسپارى بەكىتىلدى

«Nur Otan» پارتياسى پرايمەريزىنىڭ رەسپۋبليكالىق كۇنتىزبەلىك جوسپارى بەكىتىلدى. بۇل تۋرالى پارتيا توراعاسىنىڭ ءبىرىنشى ورىنباسارى باۋىرجان بايبەك Facebook-تاعى پاراقشاسىندا جازدى. 
"پارتيا ليدەرى نۇرسۇلتان نازارباەۆتىڭ تاپسىرماسىمەن پارتيا پرايمەريزى ەلىمىزدىڭ پارتيالىق-ساياسي دامۋ تاريحىندا تۇڭعىش رەت رەسپۋبليكالىق پارتياىشىلىك سايلاۋ اۋقىمىندا وتەدى. بۇل – ەلباسىنىڭ باستاماسىمەن قولعا الىنعان «سەنىم. ديالوگ. بولاشاققا نىق قادام» پارتيا جۇمىسىن «قايتا جانداندىرۋ» باعدارلاماسىنىڭ قورىتىندى كەزەڭدەرىنىڭ ءبىرى. ءبىزدىڭ باستى ماقساتىمىز – الداعى ءماجىلىس پەن بارلىق دەڭگەيدەگى ءماسليحاتتار سايلاۋىنا پارتيالىق تىزىمدەرگە ەنگىزۋ ءۇشىن قوعامنىڭ قولداۋىنا يە بولعان بەدەلدى پارتيا كوشباسشىلارىن انىقتاۋ", - دەدى ب.بايبەك.
ونىڭ ايتۋىنشا، كانديداتتار پرايمەريزگە باستاۋىش پارتيا ۇيىمىنىڭ اتىنان نەمەسە ءوزىن-ءوزى ۇسىنۋ جولىمەن دە قاتىسۋى مۇمكىن. بۇل رەتتە پارتيانىڭ قۇندىلىقتارىن ۇستاناتىن جانە سايلاۋ قۇقىعى بار كەز كەلگەن ازامات ۇمىتكەر بولا الادى. ول ءۇشىن پرايمەريزگە قاتىسۋشىلاردى تىركەۋ مەرزىمى اياقتالعانعا دەيىن «Nur Otan»-نىڭ قاتارىنا قوسىلۋ كەرەك.
"بۇگىن ورتالىق ۇيىمداستىرۋ كوميتەتىنىڭ ءبىرىنشى وتىرىسى ءوتتى. جيىن بارىسىندا پارتياىشىلىك سايلاۋدىڭ رەسپۋبليكالىق كۇنتىزبەلىك جوسپارى بەكىتىلدى. كانديداتتاردى ۇسىنۋ جانە تىركەۋ 17 تامىزدان باستالىپ 28 تامىزعا دەيىن جالعاسادى. ۇمىتكەرلەرگە ۇگىت جۇمىستارىنا دايىندالۋ ءۇشىن 7 كۇن بەرىلەدى - 31 تامىزدان 6 قىركۇيەككە دەيىن. 7 قىركۇيەكتەن 3 قازانعا دەيىنگى ارالىقتا كانديداتتاردىڭ ۇگىت جۇمىستارىن، ونىڭ ىشىندە 14-30 قىركۇيەك ارالىعىندا جاريا پىكىرسايىستار وتكىزۋ قاراستىرىلعان. پىكىرسايىستار پارتيانىڭ رەسمي اككاۋنتتارىندا تاراتىلاتىن «پرايمەريز» اقپاراتتىق جۇيەسى ارقىلى وتەدى", - دەپ ءتۇسىندىردى باۋىرجان بايبەك.
پارتيا توراعاسىنىڭ تاپسىرماسىمەن ونلاين-فورماتتا داۋىس بەرۋ ءۇشىن پلاتفورما ازىرلەنگەن. «پرايمەريز» جۇيەسى تۇرعىندارمەن كەرى بايلانىستى كۇشەيتۋدى، جۇرتشىلىقتىڭ پىكىرىن ەسكەرە وتىرىپ، ءتۇرلى باستامالار مەن زاڭ جوبالارىن ونلاين-تالقىلاۋ مۇمكىندىگىن كوزدەيدى.
1 قازان (00-00) مەن 3 قازان (14.00) ارالىعىندا ءموبيلدى قوسىمشا جانە ارنايى ۆەب-پورتال ارقىلى ەلەكتروندى داۋىس بەرۋ وتپەك.
داۋىس بەرۋدىڭ سوڭعى كۇنى (3 قازان) باستاۋىش پارتيا ۇيىمدارىنىڭ بازاسىندا سايلاۋ ۋچاسكەلەرى اشىلادى. ينتەرنەت جوق ەلدى مەكەندەردە وسىنداي سايلاۋ ۋچاسكەلەرىنە كەلىپ، قاعاز بيۋللەتەندەر ارقىلى داۋىس بەرۋگە بولادى.
كانديداتتاردىڭ رەيتينگتەرى كورسەتىلگەن پرايمەريز ناتيجەلەرى 5 قازاندا جاريالانادى.

سوڭعى جاڭالىقتار