13 تامىز, 13:31 412 0 قوعام انار لەپەسوۆا

الماتى اكىمى تروللەيبۋس ينفراقۇرىلىمى قاشان جاڭعىرتىلاتىنىن ايتتى

الماتى قالاسىنىڭ اكىمى باقىتجان ساعىنتاەۆ "الماتى" تەلەارناسىندا Akimat LIVE باعدارلاماسىنىڭ ەفيرىندە تروللەيبۋس ينفراقۇرىلىمىن جاڭعىرتۋ تۋرالى تۇرعىندار ساۋالىنا جاۋاپ بەردى، دەپ حابارلايدى Sputnik قازاقستان.

"كوروناۆيرۋستىڭ كەسىرىنەن بارلىعىنا شىعىندار ازايتىلدى. ءبىزدى تروللەيبۋستاردىڭ جاعدايى قىزىقتىرادى. كوبىنە بايلانىس جەلىلەرى ىستەن شىعىپ، تروللەيبۋستار كوشەدەگى قوزعالىستى ءجيى توقتاتىپ جاتادى. بالكىم، ترامۆاي سياقتى، تروللەيبۋستان دا باس تارتقانىمىز ءجون بولار،" - دەپ ساۋال قويدى قالا تۇرعىنى.

ساعىنتاەۆ ءوز جاۋابىندا بۇل ماسەلە كۇن تارتىبىندە ەمەس ەكەنىن ايتتى.

"2019 جىلى ءبىز ولاردىڭ جۇمىس ىستەۋىن قامتاماسىز ەتەتىن بايلانىس جەلىلەرى مەن قوسالقى ستانتسيالاردى مودەرنيزاتسيالاۋ باعدارلاماسىن قابىلدادىق. بيىل پاندەمياعا بايلانىستى بۇل شىعىنداردى ءبىرشاما تومەندەتتىك، ول جوسپارلانعان 5 ميللياردتىڭ ورنىنا 1,7 ميلليارد تەڭگەنى قۇرايدى. ناتيجەسىندە، جىل سوڭىنا دەيىن شامامەن 16 كوشەنىڭ جەلىسى جاڭعىرتىلاتىن بولادى", - دەدى ول.

قالا اكىمىنىڭ ايتۋىنشا، تروللەيبۋس ينفراقۇرىلىمىن تولىق جاڭعىرتۋ، ونىڭ ىشىندە 172 شاقىرىم بايلانىس جەلىسىن اۋىستىرۋ 2021 جىلى اياقتالادى دەپ جوسپارلانعان.

"2020 جىلدىڭ سوڭىنا دەيىن جاندوسوۆ، سەيفۋللين، قابانباي باتىر، اۋەزوۆ، روزىباكيەۆ، جۇبانوۆ، رايىمبەك، ەمتسوۆ، قالداياقوۆ، پۋشكين كوشەسىنىڭ بويىندا، رىسقۇلوۆ پەن رايىمبەك داڭعىلىنىڭ بويىەداعى بايلانىس جەلىسىنىڭ تىرەكتەرىن بولشەكتەۋ جانە ورناتۋ جوسپارلانۋدا", - دەپ تولىقتىردى ساعىنتاەۆ.

ايتا كەتەيىك، كابەلدىك جانە بايلانىس جەلىلەرىنە كۇردەلى جوندەۋ سوڭعى رەت 2000 جىلى جۇرگىزىلگەن بولاتىن.

 

سوڭعى جاڭالىقتار