13 تامىز, 09:57 871 0 دەنساۋلىق انار لەپەسوۆا

وكپەسىنىڭ 70 پايىزى زاقىمدانعان 90 جاستاعى اجەي ىندەتتى جەڭدى

شىمكەنت قالاسىنداعى "مەيىرىم" پروۆيزورلىق ورتالىعىندا ەم قابىلداعان 90 جاستاعى كۇلسارا قارسىباەۆا پنەۆمونيادان 25 كۇندە جازىلىپ شىقتى، دەپ حابارلايدى وتىرار ارناسى.

كۇلسارا اجەيدىڭ العاشقىدا تىنىس الۋى قيىنداپ، ينفەكتسيالىق اۋرۋحانانىڭ جانساقتاۋ بولىمىنە جەتكىزىلگەن. دارىگەرلەردىڭ تەكسەرۋىنەن كەيىن وكپەسىنىڭ ەكى جاقتى 70 پايىز زاقىمدانعانى انىقتالىپ، پنەۆمونيا دياگنوزى قويىلعان. جانساقتاۋ بولىمىندە ءۇش كۇن ەمدەلگەن سوڭ، "مەيىرىم" پروۆيزورلىق ورتالىعىنا ءوز قالاۋىمەن اۋىستىرىلدى.

تۇسكەن كەزدەگى ناۋقاستىڭ جاعدايى اۋىر بولعان. اق حالاتتىلار دەر كەزىندە ەمدەۋ حاتتاماسىنا سايكەس مەديتسينالىق كومەك كورسەتىپ، دۇرىس جۇرگىزىلگەن ەمدەۋ شارالارىنىڭ ناتيجەسىندە، 25 كۇننىڭ ىشىندە كۇلسارا قارسىباەۆانىڭ دەنساۋلىعى جاقسارا تۇسكەن. دەنساۋلىق جاعدايىنىڭ اۋىرلىعىنا جانە قوسىمشا سوزىلمالى اۋرۋلارىنا (سوزىلمالى حولەتسيستيت، پانكرەاتيت، ارتەريالىق گيپەرتەنزيا) قاراماي، اجەي پنەۆمونيادان جازىلعان.

دارىگەرلەر كۇلسارا قارسىباەۆانىڭ قازىرگى جاعدايى جاقسى ەكەنىن ايتادى. تولىقتاي ساۋىققان اجەي دارىگەرلەرىنە اق باتاسىن بەرىپ، وتباسىنا ورالعان.

سوڭعى جاڭالىقتار