12 تامىز, 19:50 497 0 ايماق انار لەپەسوۆا

COVID-19: اتىراۋدا ناۋقاستاردىڭ 74 پايىزى ەمدەلىپ شىقتى

اتىراۋ وبلىسىندا كوروناۆيرۋس جۇقتىرعانداردىڭ 74 پايىزى ەمدەلىپ شىقتى. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى نۇرلىبەك قابدىقاپاروۆ مالىمدەدى.

"12 تامىزداعى دەرەك بويىنشا،  اتىراۋ وبلىسىندا كوروناۆيرۋس ينفەكتسياسىن جۇقتىرعان 10638 ناۋقاس تىركەلدى. ونىڭ ىشىندە 7869 پاتسيەنت ەمدەلىپ شىقتى. قاۋىپتى ىندەتتەن جازىلىپ شىققانداردىڭ كورسەتكىشى 74 پايىزدى قۇرادى. ناۋقاستار سانىنىڭ ازايۋىنا بايلانىستى  كارانتيندىك ستانتسيونارلار جابىلدى", - دەدى  باسقارما باسشىسى.

نۇرلىبەك قابدىقاپاروۆتىڭ ايتۋىنشا، ەپيدەميولوگيالىق احۋال جاقسارعانىمەن، الداعى جاعدايدى بولجاي مۇمكىن ەمەس. سوندىقتان وڭىردە كوروناۆيرۋستىڭ ەكىنشى تولقىنىنا دايىندىق كۇشەيتىلىپتى. ەمدەۋ مەكەمەلەرىندە ءدارى-دارمەك قورى جاساقتالعان.

وبلىستىق دەنساۋلىق ساقتاۋ باسقارماسىنىڭ باسشىسى ايماق تۇرعىندارىن ءوز دەنساۋلىعىنا سالعىرت قاراماي، قورعانىش قۇرالدارىن پايدالانۋعا، قوعامدىق ورتادا ارا-قاشىقتىقتى ساقتاپ، كىسى كوپ جۇرەتىن ورىندارعا بارماۋعا شاقىردى.

ەسكە سالا كەتەيىك، بۇعان دەيىن نۇر-سۇلتاندا COVID-19 ىندەتىن جۇقتىرعان ناۋقاستاردىڭ 76 پايىزى ەمدەلىپ شىققانىن حابارلاعانبىز.

سونداي-اق، تالدىقورعاندا دا ىندەتتەن ايىققاندار سانى ارتىپ، كوروناۆيرۋس جۇقتىرعانداردى ەمدەۋ ءۇشىن اشىلعان ەكى پروۆيزورلىق ورتالىق جابىلدى.

سوڭعى جاڭالىقتار