12 تامىز, 13:21 493 0 ءبىلىم ارايلىم بيمەنديەۆا

جامبىلدىق وقۋشىلارعا 30 مىڭنان استام كومپيۋتەر ساتىپ الىنادى

جامبىل وبلىسىنىڭ اكىمى بەردىبەك ساپارباەۆ ءباسپاسوز كونفەرەنتسياسىن وتكىزىپ، وندا جاڭا وقۋ جىلىنا دايىندىق بارىسى تۋرالى باياندادى. وبلىس اكىمىنىڭ ايتۋىنشا، جاڭا وقۋ جىلىندا وبلىستاعى 442 مەكتەپ بويىنشا 234,7 مىڭ وقۋشى ءبىلىم الادى. ونىڭ ىشىندە 26,4 مىڭ ءبۇلدىرشىن بيىل ءبىرىنشى سىنىپقا بارادى.

– پاندەمياعا بايلانىستى وقۋ پروتسەسى ەكى ءتۇرلى فورماتتا وتەدى. اتاپ ايتساق، وبلىستىڭ 275 مەكتەبىندە 215,4 مىڭ وقۋشى قاشىقتان وقىتۋدى باستاسا، 167 مەكتەپتەگى 19,3 مىڭ وقۋشى بارلىق سانيتارلىق تالاپتاردى ساقتاي وتىرىپ ءداستۇرلى تۇردە ءبىلىم الۋدى جالعاستىرادى. ءبىلىم بەرۋ نىساندارى دەزينفەكتسيالاۋ قۇرالدارىمەن، سانيتارلىق تازارتقىشتارمەن، تەپلوۆيزورلار جانە باسقا دا قورعانىش قۇرالدارىنىڭ قاجەتتى قورىمەن قامتاماسىز ەتىلگەن، – دەپ اتاپ ءوتتى وبلىس اكىمى.

قاشىقتان وقىتۋ «DarynOnlain» ءبىلىم بەرۋ پلاتفورماسىنىڭ كومەگىمەن جۇزەگە اسىرىلادى. سونىمەن قاتار، جۇمىس ىستەيتىن، ۇيدە بالالارىنا ونلاين رەجيمدە ءبىلىم بەرۋدى ۇيىمداستىرا المايتىن اتا-انالار ءۇشىن قاتاڭ سانيتارلىق-ەپيدەميولوگيالىق تالاپتارعا سايكەس «كەزەكشى 1-4 سىنىپتار» اشۋ مۇمكىندىگى قاراستىرىلۋدا.

ساپالى قاشىقتان وقىتۋدى ۇيىمداستىرۋ ءۇشىن وقۋشىلار مەن مۇعالىمدەردى كومپيۋتەرلەرمەن جانە ينتەرنەتپەن قامتاماسىز ەتۋ ماسەلەسى شەشىلۋدە. قازىرگى تاڭدا مەكتەپ وقۋشىلارىنىڭ 134,8 مىڭى نەمەسە جالپى سانىنىڭ 57,4 پايىزى دەربەس كومپيۋتەرلەرمەن جانە نوۋتبۋكتەرمەن قامتاماسىز ەتىلگەن، ال 99,8 مىڭ (42,5%) وقۋشىدا كومپيۋتەرلىك تەحنيكا جوق.

– وبلىس مەكتەپتەرىندە 25,6 مىڭ كومپيۋتەر بار، تاعى 26,4 مىڭ كومپيۋتەر ساتىپ الۋعا رەسپۋبليكالىق بيۋدجەتتەن 4,1 ملرد. تەڭگە ءبولىندى. قوسىمشا 4,5 مىڭ كومپيۋتەر جەرگىلىكتى بيۋدجەت ەسەبىنەن ساتىپ الىنادى. سونداي-اق، 23 مىڭ روۋتەر-مودەم ساتىپ الۋ جوسپارلانۋدا.

كومپيۋتەر جانە ينتەرنەتپەن قامتاماسىز ەتۋدە الدىمەن كوپ بالالى جانە از قامتىلعان وتباسىلاردىڭ بالالارىنا، جەتىم، اتا-اناسىنىڭ قامقورلىعىنسىز قالعان، سونداي-اق ەرەكشە قاجەتتىلىكتەرى بار بالالار نازارعا الىنادى. بۇل ساناتتارعا شامامەن 40 مىڭعا جۋىق بالا كىرەدى، – دەدى ايماق باسشىسى.

ايتا كەتۋ كەرەك، وبلىس وقۋشىلارىن وقۋلىقتارمەن جانە وقۋ-ادىستەمەلىك كەشەندەرمەن قامتاماسىز ەتۋگە 2,9 ملرد. تەڭگە بولىنگەن. وقۋلىقتاردى ۇلەستىرۋ 25 تامىزعا دەيىن تولىعىمەن اياقتالاتىن بولادى. جاڭا وقۋ جىلىندا مەكتەپ وقۋشىلارى وقۋلىقتارمەن 100 پايىز قامتىلادى.

سوڭعى جاڭالىقتار