12 تامىز, 12:00 465 0 نۇر وتان انار لەپەسوۆا

ەلباسى تاپسىرماسىمەن «جاستار – وتانعا!» جوباسى ازىرلەندى

«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك قازاقستاندىقتاردى حالىقارالىق جاستار كۇنىمەن قۇتتىقتاپ، ەلدىڭ بەلسەندى جاستارىنا العىس ايتتى. 

«بۇگىن – حالىقارالىق جاستار كۇنى. وسىعان وراي ەلباسى مەن مەملەكەت باسشىسى باستاماشى بولعان #BizBirgemiz رەسپۋبليكالىق اكتسياسىنىڭ بەلسەندىلەرى مەن ۆولونتەرلارىنا تاعى دا العىس ايتقىم كەلەدى.

وسىناۋ كۇردەلى كەزەڭدە ءبىز جاستارىمىزدىڭ جانكەشتى قايسارلىقتارى مەن ۇلكەن جۇرەكتى پاتريوتتىقتارىنا كۋا بولدىق.

5 مىڭنان استام جاسوتاندىقتار مەن ەرىكتىلەر بۇكىل ەل كولەمىندە مۇقتاجدارعا ازىق-تۇلىك سەبەتتەرىن، ماسكالار مەن ءبىرىنشى كەزەكتە قاجەتتى زاتتاردى جەتكىزىپ بەردى. «Jas Otan» ۆولونتەرلارى ماقتاراارالداعى سۋ باسۋدان زارداپ شەككەن تۇرعىندارعا دا العاشقىلاردىڭ ءبىرى بولىپ كومەككە كەلدى.

ءبىزدىڭ جاستار قاناتىمىز جۋىردا «دارىگەرلەرگە مىڭ العىس!» اتتى تاعى ءبىر اكتسياعا باستاماشى بولدى. وسى شارا اياسىندا بۇكىل ەل بويىنشا مەديتسينا قىزمەتكەرلەرىنە قىمىز، شۇبات جانە يممۋنيتەتتى كۇشەيتەتىن باسقا دا ونىمدەردەن تۇراتىن «العىس پاكەتتەرىن» جەتكىزىپ بەردى.

ىنتىماق – پارتيامىزدىڭ باستى قۇندىلىقتارىنىڭ ءبىرى. ول رۋحى كۇشتىلەردىڭ ءالسىز جاندارعا، باقۋاتتى كىسىلەردىڭ تۇرمىسى تومەندەرگە، دەنساۋلىعى جاقسى ادامداردىڭ ناۋقاستارعا، جاسى ۇلكەندەردىڭ وزىنەن كىشىلەرگە جاناشىر بولۋىنان تانىلادى.

ەلىمىزدە وزدەرىن جانە اينالاسىن جاقسى جاققا قاراي وزگەرتۋگە قۇشتار ۇرپاقتىڭ ءوسىپ كەلە جاتقانى سۇيسىندىرەدى. بۇل – جاسامپازدىققا دەن قويعان، جاۋاپكەرشىلىك الا الاتىن، ىنتىماقشىلدىق تانىتىپ، ءوزارا قولۇشىن بەرۋگە دايىن بۋىن. #BizBirgemiz يدەياسىنىڭ دا ءمانى – وسى.

«Nur Otan»-نىڭ الداعى پارتياىشىلىك پرايمەريزى جاستاردىڭ وزدەرىن كورسەتۋلەرىنە، باسەكەلىك ساياسي كۇرەستە ليدەرلىك قابىلەتتەرىن ايقىنداۋلارىنا مۇمكىندىك بەرەدى دەپ ويلايمىن.

ءبىزدىڭ ماقساتىمىز – ءماجىلىس پەن بارلىق دەڭگەيدەگى ماسليحاتتارعا الدا بولاتىن سايلاۋلارعا ايقىن پارتيالىق تىزىمدەردى قالىپتاستىرۋ ءۇشىن جاڭا ليدەرلەردى انىقتاۋدا بارىنشا اشىق ىرىكتەۋ وتكىزۋ.

بۇل ءۇشىن ەلباسىنىڭ شەشىمىمەن 35 جاسقا دەيىنگى جاستارعا «Nur Otan»-نىڭ پارتيالىق تىزىمدەرىندە ارنايى 20%-تىك كۆوتا كوزدەلگەن.

پرايمەريز بارىسىندا ءوز اۋدانى، قالاسى، وبلىسى ءۇشىن ەڭ لايىقتى وكىلدەر تاڭدالىپ الىناتىنىنا سەنىمدىمىن. ولار بەلسەندى تۇردە جاستاردىڭ مۇددەسىن قورعايتىن بولادى.

پارتيامىزدىڭ ليدەرى نۇرسۇلتان نازارباەۆتىڭ تاپسىرماسىنا سايكەس پارتيانىڭ جاس جاقتاستارى بەسجىلدىق «جاستار – وتانعا!» جاستار باعدارلاماسىنىڭ جوباسىن ازىرلەدى.

الەمدىك وزىق تاجىريبەلەردى جانە ەلىمىزدىڭ بۇكىل وڭىرىنەن جاستاردان تۇسكەن 3 مىڭنان استام ۇسىنىستى ەسكەرە وتىرىپ دايىندالعان بۇل قۇجات «Jas Otan» سايتىندا جاريالاندى.

باعدارلامادا جاستاردىڭ نەگىزگى 5 ماسەلەسى قامتىلىپ، ولاردى شەشۋ جولدارى ۇسىنىلعان.

ءبىزدىڭ كۇش-جىگەرىمىز قولجەتىمدى باسپانا جانە جاس وتباسىلارعا قولداۋ كورسەتۋ، جۇمىسپەن قامتۋ، ساپالى ءبىلىم، ەلدىڭ قوعامدىق-ساياسي ومىرىنە قاتىسۋ سەكىلدى نەگىزگى ماسەلەلەرگە جۇمىلدىرىلاتىن بولادى.

ءاربىر باعىت بويىنشا كەشەندى شارالار ازىرلەنىپ، ناقتى ينديكاتورلار بەلگىلەنگەن.

باعدارلامانىڭ تۇپكىلىكتى نۇسقاسى «Jas Otan» الاڭىندا قىركۇيەكتە تالقىلاناتىن بولادى. سول ۋاقىتقا دەيىن اركىم ءوز ەسكەرتۋلەرى مەن ۇسىنىستارىن ەنگىزە الادى.

جاستار – ەلىمىزدىڭ بولاشاعى! ءبىز جاستارمەن بىرگەمىز!»، – دەپ جازدى Facebook-تاعى پاراقشاسىندا. 

سوڭعى جاڭالىقتار