11 تامىز, 10:20 416 0 رۋحانيات انار لەپەسوۆا

“اباي جولى” ەپوپەياسىنىڭ ۆيدەوسامماريى جارىق كوردى

اباي قۇنانبايۇلىنىڭ 175 جىلدىعىنا وراي مۇحتار اۋەزوۆتىڭ "اباي جولى" رومان-ەپوپەياسىنىڭ قىسقاشا مازمۇنىنا ۆيدەوسامماري جارىق كوردى. ۆيدەوجوبا قر اقپارات جانە قوعامدىق دامۋ مينيسترلىگىنىڭ قولداۋىمەن Massaget.kz سايتىنىڭ YouTube-ارناسىندا كورەرمەن نازارىنا ۇسىنىلدى.

"اباي جولىنىڭ" قىسقاشا مازمۇنى ءار تاراۋ بويىنشا دايىندالعان. ءتورت تومدىق ەپوپەيا بارلىعى 28 تاراۋدان تۇرادى. ءار ۆيدەوسامماريدىڭ ۇزاقتىعى – 12-15 مينۋت. ۆيدەوسامماري – كىتاپتىڭ نەگىزگى يدەياسىن، مازمۇنىن ۆيدەو تۇرىندە ۇسىنۋ.

"وسكەلەڭ ۇرپاققا اباي جادىگەرلەرىن ناسيحاتتاپ، ونىڭ ەڭبەكتەرىندەگى ىزگى ويلاردى دارىتۋ اسا ماڭىزدى. ءبىزدىڭ بۇل جوبامىز كورەرمەن كوڭىلىنەن شىعىپ، ابايدى تانۋعا سەبەپ بولادى دەپ سەنەمىز", - دەيدى اقپارات جانە قوعامدىق دامۋ ءمينيسترى ايدا بالاەۆا.

كىشكەنتاي كورەرمەندەردىڭ نازارىن اۋدارتىپ، كارتينانى قابىلداۋ قابىلەتىن ارتتىرۋ ءۇشىن doodle انيماتسيا ستيلىندە ۇسىنىلدى، دىبىستىق فون قوسىلدى. Massaget.kz سايتىنىڭ ارت-ديرەكتورى ءارى جوبا جەتەكشىسى – ەرنار المابەك، سۋرەتشىسى – توميريس ەسقالي، دىبىستاعان – شامشاددين وماروۆ.

"اباي جولى" ءار وقىعان سايىن وزگەشە كۇيگە بولەيتىن ەپوپەيالىق رومان. شىعارما مەكتەپ باعدارلاماسىنا كىرگەنىمەن، وقۋشىلار كەيىپكەرىن كوزگە ەلەستەتىپ، ەموتسيا كەشىپ، مازمۇنىن ەستە ساقتاي بەرمەيدى. ءتىپتى ەرەسەك ادامداردىڭ وزدەرى دە روماننىڭ اۆتورىن بىلۋمەن عانا شەكتەلەدى.

ابايدىڭ تۋعان كۇنىنە وراي ءبىز ءتىلى دە، مازمۇنى دا كۇردەلى شىعارمانىڭ ۆيدەوسامماريىن دايىندادىق. ەندى كورەرمەن 28 تاراۋدىڭ مازمۇنىمەن ساناۋلى مينۋتتاردا تانىسا الادى. وسىلايشا كىتاپقا دەگەن قىزىعۋشىلىعى ويانعان ولار كۇندەردىڭ ءبىر كۇنى توم-تومدى پاراقتايدى دەگەن ءۇمىتىمىز بار", - دەيدى جوبا جەتەكشىسى ەرنار المابەك.

مازمۇن ماتىنىنە شىعارمانىڭ نەگىزگى بولىكتەرى تاڭدالىپ، جازۋشىنىڭ ءتىلى مەن كوركەمدىك قۇرالدارى ساقتالعان. شىعارمانىڭ ءبىرىنشى تومىنداعى تاراۋلار ءار دۇيسەنبى سايىن Massaget TV YouTube-ارناسىندا جاريالانىپ تۇرادى. جوبانىڭ اقپاراتتىق سەرىكتەسى – Alash Media Group مەدياحولدينگى.

اباي كۇنىنە وراي 10 تامىزدا ءى تومنىڭ "قايتقاندا" تاراۋى كورەرمەن نازارىنا ۇسىنىلدى.

;t=38s

سوڭعى جاڭالىقتار