11 تامىز, 12:16 476 0 جاڭالىقتار انار لەپەسوۆا

بەيرۋتتاعى جارىلىس ورنىندا ۇلكەن كراتەر پايدا بولدى

بەيرۋتتاعى جارىلىس سالدارىنان پورت جويىلىپ، سان مىڭداعان ءۇي قيراپ قانا قويماي، ۇلكەن كراتەر پايدا بولدى. مامانداردىڭ ەسەپتەۋىنشە، ونىڭ تەرەڭدىگى 43 مەتر.

ەسكە سالا كەتەيىك، 4 تامىزدا بەيرۋتتاعى پورتتا اممياك سەليتراسى ساقتالعان قويمادا جويقىن جارىلىس بولدى. 158 ادام قازا تاپتى، 6 مىڭنان اسا ادام زارداپ شەكتى. زارداپ شەككەندەر اراسىندا قازاقستاننىڭ كونسۋلى دا بار.

قازىر اپات ورنىندا ىزدەستىرۋ وپەراتسياسى جالعاسۋدا. الايدا ماماندار قۇتقارۋ جۇمىستارىن توقتاتتى. ويتكەنى  قيراندىلار استىنان ءتىرى ادامداردىڭ تابىلۋى ەكىتالاي.

جارىلىس سالدارىنان 250 مىڭعا جۋىق تۇرعىن باسپاناسىز قالدى. استىق قورىنىڭ 85 پروتسەنتى جويىلدى.  توتەنشە جاعدايدان كەلتىرىلگەن ماتەريالدىق شىعىن 15 ميلليرد دوللارعا دەيىن جەتۋى مۇمكىن. اپات ونسىز دا ەكونوميكالىق داعدارىستى باستان كەشىرىپ جاتقان مەملەكەت ءۇشىن ۇلكەن سوققى بولدى.

بۇعان دەيىن فرانتسيا پرەزيدەنتى ەممانۋەل ماكرون الەم ەلدەرىن ليۆانعا كومەكتەسۋگە شاقىرعانىن حابارلاعانبىز.

ماكروننىڭ باستاماسىمەن ليۆانعا قولداۋ كورسەتۋ جۇمىستارىن ۇيلەستىرۋ بويىنشا «دونور ەلدەر» جيىنى ونلاين فورماتتا ءوتتى. جيىندا فرانتسيا پرەزيدەنتى جويقىن جارىلىستان زارداپ شەككەن ليۆان حالقىنا كومەكتەسۋ كەرەگىن العا تارتتى. ماكروننىڭ سوزىنشە، بۇل ءىس ليۆان مەن ونىڭ حالقىن قولداۋداعى بىرلىكتىڭ بىرەگەي ۇلگىسى بولۋى ءتيىس.

 

سوڭعى جاڭالىقتار