10 تامىز, 20:37 531 0 دەنساۋلىق انار لەپەسوۆا

ەلوردادا پنەۆمونياعا شالدىققاندار سانى 6 ەسە ازايدى

كارانتيننىڭ ەنگىزىلۋى نۇر-سۇلتانداعى ەپيدەميولوگيالىق احۋالدى تۇراقتاندىرىپ، ينفەكتسيالىق ستاتسيونارلارداعى توسەك-ورىنعا سۇرانىستى 99 پايىزدان 18,5 پايىزعا دەيىن تومەندەتتى. بۇل تۋرالى  قالا اكىمى التاي كولگىنوۆ  Instagram-داعى پاراقشاسىندا جازدى.

«كارانتين الىنعاننان كەيىن ەپيدەميولوگيالىق جاعدايدىڭ قالاي بولارىنا تالداۋ جاسادىق. بولجامعا سايكەس، جاعداي بىردەن جاقسارىپ كەتپەيدى. ورۆي ماۋسىمىن ەسكەرسەك جىلداعىداي مەديتسينالىق مەكەمەلەرگە اۋرىتپالىق تۇسەدى. قازىردىڭ وزىندە دايىندىق جۇمىستارىن جۇرگىزىپ جاتىرمىز. ەمحانا، اۋرۋحانالارعا قوسىمشا كومەك كورسەتىلدى. 600-دەن استام فلۋومەتر، 500-گە جۋىق وتتەگى كونتسەنتراتورى، 500-گە جۋىق ارنايى توسەك-ورىن، وكپەنى جاساندى جەلدەتۋ جانە كت اپپاراتتارى الىندى. الداعى ۋاقىتتا جەدەل جاردەم كولىكتەرى دە جەتكىزىلەدى. ەكى اپتا ىشىندە قالاعا 110 توننادان استام ءدارى جەتكىزىلدى. ءبىز بۇل جۇمىستاردى جۇيەلى نەگىزدە جالعاستىرا بەرەمىز»، - دەدى ا.كولگىنوۆ.

شاھار باسشىسى قاجەت بولعان جاعدايدا بارلىق 16 ينفەكتسيالىق ستاتسيونار قايتا اشىلاتىنىن جەتكىزدى.

«سپورتتىق عيماراتتار مەن باسقا دا بىرقاتار نىسان كەز كەلگەن ساتتە ورىندار ازىرلەي الادى. جاسىراتىنى جوق، قالا تۇرعىندارى العاشقى كارانتيننەن كەيىن سانيتاريا نورمالارىن ساقتامادى. بۇل، كەرى اسەرىن تيگىزىپ، ىندەتكە شالدىققانداردىڭ سانى كۇرت ءوستى. دارىگەرلەر مەن مەديتسينالىق ۇيىمدار مۇمكىندىگىنشە بارىن سالىپ جۇمىس ىستەدى. كارانتين شارالارى عانا جاعدايدى تۇراقتاندىرۋعا مۇمكىندىك بەردى»، - دەدى ول.

نۇر-سۇلتاندا ينفەكتسيالىق ستاتسيونارلارداعى توسەك-ورىنعا سۇرانىس شىلدە ايىنىڭ باسىنان باستاپ 99 پايىزدان 18,5 پايىزعا دەيىن تومەندەدى. 16 ستاتسيوناردىڭ بەسەۋى جابىلدى. ولاردا بولعان بارلىق ناۋقاستار جازىلىپ شىقتى. كۆي ماسەلەلەرى بويىنشا جەدەل جاردەم شاقىرۋ سانى 9,5 ەسەگە جۋىق تومەندەپ، تاۋلىگىنە 500-دەن 53-كە دەيىن ازايدى. ستاتسيونارلاردا پنەۆمونيامەن اۋىراتىن ناۋقاستاردىڭ سانى 6 ەسە قىسقاردى.

ەرتەڭنەن باستاپ قالالىق ەمحانالار جوسپارلى قابىلداۋعا قايتا كىرىسەدى. دەسە دە، التاي كولگىنوۆ تۇرعىندارعا ىندەتتى جۇقتىرۋ قاۋپى جويىلماعانىن ەسكەرتتى.

"ينفەكتسيانى توقتاتۋ ءۇشىن ساقتىق شارالارى مەن سانيتاريا نورمالارىن بارىنشا ساقتاۋ قاجەت»، - دەپ جازدى قالا باسشىسى.

ەسكە سالا كەتسەك، بۇعان دەيىن قر دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ ەلىمىزدە كوروناۆيرۋستى جۇقتىرۋ ءوسىمى توقتاعانىن مالىمدەدى. ونىڭ ايتۋىنشا، ەندىگى مىندەت – ىندەتتى جۇقتىرۋ مەن ءولىم-ءجىتىمدى توقتاتۋ.

سوڭعى دەرەك بويىنشا، قازاقستاندا ىندەتكە شالدىققانداردىڭ جالپى سانى 99 442-گە جەتتى. ىندەتتەن 72,5 مىڭ ادام ەمدەلىپ شىقتى. 1058 ادام قايتىس بولدى. ال  كوروناۆيرۋس بەلگىلەرى بار پنەۆمونياعا شالدىعۋدىڭ 13280 دەرەگى تىركەلدى. تامىزدىڭ باسىنان بەرى وكپە دەرتىنەن 161 ادام كوز جۇمدى.

 

سوڭعى جاڭالىقتار