10 تامىز, 14:24 395 0 قوعام انار لەپەسوۆا

الماتىدا ەكىنشى ءمودۋلدى اۋرۋحانا قۇرىلىسى باستالدى

الماتىدا ەكىنشى ءمودۋلدى جۇقپالى اۋرۋلار اۋرۋحاناسىنىڭ قۇرىلىسى باستالدى. بۇل تۋرالى قالا اكىمى باقىتجان ساعىنتاەۆ الەۋمەتتىك جەلىدە حابارلادى. 

"COVID-19-عا قارسى ءىس-قيمىل شارالارى اياسىندا توسەك سانىن ارتتىرىپ، قۋاتتىلىقتى كۇشەيتۋدى جالعاستىرامىز. بۇل رەتتە 300 توسەك-ورىنعا ارنالعان، ونىڭ 30-ى رەانيماتسيالىق، ەكىنشى ءمودۋلدى جۇقپالى اۋرۋلار اۋرۋحاناسىنىڭ قۇرىلىسى باستالدى", - دەپ جازدى ساعىنتاەۆ Instagram پاراقشاسىندا.

اكىمنىڭ ايتۋىنشا، جاڭا اۋرۋحانا مەديتسينالىق گاز جۇيەسىمەن، سونداي-اق كت، ۋدز جانە رەنتگەن اپپاراتتارىمەن قامتاماسىز ەتىلەدى. گوسپيتال تولىعىمەن تسيفرلىق نەگىزدە بولادى. ياعني، تەكسەرۋ بايلانىسسىز ادىسپەن، ال باقىلاۋ – ۆيدەوبايلانىس ارقىلى جۇرگىزىلمەك. اۆتوماتتاندىرىلعان جۇيە ناۋقاستىڭ جاعدايىن جەدەل باقىلاۋعا، سونداي-اق "جاسىل" جانە "قىزىل" ايماقتار بويىنشا قىزمەتكەرلەردىڭ قوزعالىسىن باقىلاۋعا مۇمكىندىك بەرەدى.

ەسكە سالا كەتەيىك، الماتىداعى العاشقى ءمودۋلدى اۋرۋحانا بيىلعى جىلدىڭ ءساۋىر ايىندا سالىنعان بولاتىن.  24 ساۋىردە اشىلعان  اۋرۋحانادا كوروناۆيرۋس جۇقتىرعان ناۋقاستار ەمدەلۋدە.

بۇعان دەيىن قالا اكىمى باقىتجان ساعىنتاەۆ كۇزدە الماتىدا 7,7 مىڭ ناۋقاسقا ورىن دايىندالاتىنىن ايتقان ەدى.

ىندەت تارالعالى وڭتۇستىك استانادا 13 433 ادامنان كوروناۆيرۋس انىقتالدى. 8231 ادام ەمدەلىپ شىقسا، دەرتى اسقىنعان 164 ناۋقاس قايتىس بولدى.

 

سوڭعى جاڭالىقتار