8 تامىز, 13:17 716 0 جاڭالىقتار اسىل تۇمار

ەندى ساتىپ العان كولىكتى بىردەن اۆتوسالوندا تىركەۋگە بولادى

تسيفرلىق دامۋ، يننوۆاتسيالار جانە اەروعارىش ونەركاسىبى ءبىرىنشى ۆيتسە-ءمينيسترى باعدات مۋسين اۆتوكولىكتى تىركەۋ ءراسىمىن جەڭىلدەتۋ شارالارى تۋرالى ايتتى.

«اپتانىڭ باسىندا مامانداندىرىلعان حقكو-عا باردىم. ادام وتە كوپ. ەلوردالىق مامانداندىرىلعان حقكو-عا كەلۋشىلەر سانى بىرنەشە مىڭنان اسادى. ارينە، ءبىزدىڭ مىندەتىمىز – قىزمەتتىڭ ءبارىن اۆتوماتتاندىرۋ. قر ءىىم-ءنىڭ تسيفرلاندىرۋ بويىنشا جاڭادان تاعايىندالعان ۆيتسە-ءمينيسترى ساكەن سارسەنوۆپەن بىرگە پروتسەستى جەڭىلدەتۋدى پىسىقتاۋدامىز. بىزگە قازىر حقكو-عا كەلۋشىلەر سانىن مۇمكىندىگىنشە ازايتۋ قاجەت. جۇرگىزىلگەن تالداۋ ناتيجەسى نۇر-سۇلتان قالاسىندا رەسىمدەلەتىن اۆتوكولىكتىڭ 30% اۆتوسالوننان ساتىپ الىناتىنى انىقتالدى. سوندىقتان اۆتوسالونداردا مامانداندىرىلعان حقكو بۇرىشىن ۇيىمداستىرۋدى ۇيعاردىق»، – دەپ جازدى ب. مۋسين الەۋمەتتىك جەلىدەگى پاراقشاسىندا.

ونىڭ سوزىنە قاراعاندا، اۆتوكولىكتى تاڭداۋ، بانك وپەراتورىنىڭ نەسيە رەسىمدەۋى، حقكو وپەراتورىنىڭ اۆتوكولىك كەپىلدىگىن رەسىمدەۋى، مەملەكەتتىك ءنومىر مەن تەحقۇجاتتى الۋ – ءبارى ءبىر جەردە، اۆتوسالوندا جاسالادى.

«بۇگىندە قالاداعى بىرقاتار اۆتوسالوندا وسىنداي بۇرىشتار جۇمىس ىستەيدى. سوندىقتان، قالعان اۆتوسالونداردى ءوز كليەنتتەرىنە وسىنداي قىزمەت كورسەتۋگە شاقىرامىز. ول ءۇشىن ازاماتتارعا ارنالعان ۇكىمەتكە حابارلاسۋ قاجەت. بىزگە ادامداردىڭ الەۋمەتتىك قاشىقتىقتى ساقتاۋىنا جاعداي جاساۋ ماڭىزدى!»، – دەدى ءبىرىنشى ۆيتسە-مينيستر.

باعدات مۋسين ەلوردانىڭ ALLURAUTO اۆتوسالونىندا اشىلعان حقو بۇرىشىندا بولدى. ءدال وسىنداي شاعىن حقو Astana motors اۆتوسالونىندا دا اشىلدى. ەندى مامانداندىرىلعان حقو-عا جۇگىنۋدىڭ قاجەتى جوق، «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ماماندارى قىزمەتتى ءدال وسى جەردە ۇسىنا الادى.

مەملەكەتتىك كورپوراتسيانىڭ قىزمەتكەرى كولىك تىركەۋىنە قۇجاتتاردى قابىلدايدى، ال بىرنەشە ساعاتتان كەيىن كۋرەر كولىك ءنومىرى مەن دايىن تىركەۋ كۋالىگىن جاڭا كولىك يەسىنىڭ ۇيىنە جەتكىزىپ بەرەدى.

بۇل جوبا قازىردىڭ وزىندە نۇر-سۇلتان، الماتى جانە شىمكەنت قالالارىنداعى Mercedes-Benz جانە AsterAuto اۆتوسالوندارىندا جۇمىس ىستەيدى. الداعى ۋاقىتتا ALLURAUTO-نىڭ الماتى مەن شىمكەنت قالالارىنداعى اۆتوسالوندارىندا ءتيىستى بايلانىس ارنالارىن جۇرگىزۋ جوسپارلانۋدا.

سوڭعى جاڭالىقتار