6 تامىز, 20:13 1193 0 قوعام انار لەپەسوۆا

اباي كۇنى: قازاقستاندىقتار 10 تامىزدا دەمالا ما؟

قازاقستان رەسپۋبليكاسى ۇكىمەتىنىڭ قاۋلىسىمەن 10 تامىز اباي كۇنى بولىپ جاريالاندى جانە مەرەكەلەر كۇنتىزبەسىنە ەنگىزىلدى. وسى جاڭالىققا وراي، مەرەكە كۇنى دەمالىس بولا ما دەگەن سۇراق كوپشىلىكتى قىزىقتىردى. وسىعان بايلانىستى ۇكىمەتتىڭ ءباسپاسوز قىزمەتى تۇسىنىكتەمە بەردى. 

مادەنيەت جانە سپورت مينيسترلىگىنىڭ ۇسىنىسىمەن قازاقستاندا جاڭا مەرەكە - اباي كۇنى پايدا بولدى. ۇكىمەت 10-شى تامىزدى مەرەكەلەر كۇنتىزبەسىنە ەنگىزدى. الايدا، بۇل كۇنى قازاقستاندىقتار دەمالمايدى.

"مەرەكەلەر تۋرالى" زاڭعا سايكەس ۇلتتىق جانە مەملەكەتتىك مەرەكەلەر اتاپ وتىلەتىن كۇندەر مەرەكە كۇندەرى دەپ تانىلادى جانە جۇمىس ىستەمەيتىن كۇندەر بولىپ تابىلادى", - دەلىنگەن حابارلامادا.

ايتا كەتەيىك، ۇلتتىق مەرەكەلەرگە 16-17 جەلتوقساندا اتاپ وتىلەتىن تاۋەلسىزدىك كۇنى جاتادى. ال مەملەكەتتىك مەرەكەلەرگە جاڭا جىل، حالىقارالىق ايەلدەر كۇنى، ناۋرىز مەيرامى، قازاقستان حالقىنىڭ بىرلىگى مەرەكەسى، وتان قورعاۋشىلار كۇنى، جەڭىس كۇنى، استانا كۇنى، كونستيتۋتسيا كۇنى، قازاقستان رەسپۋبليكاسىنىڭ تۇڭعىش پرەزيدەنتى كۇنى جاتادى.

بۇدان بولەك، قازاقستاندا العىس ايتۋ كۇنى، عارىشكەرلەر كۇنى، پوليتسيا كۇنى جانە ت.ب. مەرەكەلەر بار. اباي كۇنى دە وسى مەرەكەلىك كۇندەر تىزىمىنە ەنگىزىلدى، سوندىقتان دەمالىس بولمايدى.

سوڭعى جاڭالىقتار