5 تامىز, 15:58 558 0 جاڭالىقتار اسىل تۇمار

پرەمەر-مينيستر «سق-فارماتسيا» مەكەمەسىنىڭ جۇمىسىن تەكسەردى

قر پرەمەر-ءمينيسترى اسقار مامين نۇر-سۇلتان قالاسىنداعى «سق-فارماتسيا» لوگيستيكالىق حابىنا بارىپ، وندا COVID-19-دان ەمدەۋگە ارنالعان دارىلەردىڭ بار-جوعىمەن جانە قر دەنساۋلىق ساقتاۋ مەكەمەلەرىن مەديتسينالىق ءدارى-دارمەكتەرمەن قامتاماسىز ەتۋ بويىنشا قابىلدانىپ جاتقان شارالارمەن تانىستى. بۇل تۋرالى ۇكىمەتتىڭ رەسمي سايتى حابارلادى.

دەنساۋلىق ساقتاۋ ءمينيسترى ا.تسوي مەن «سق-فارماتسيا» باسقارما توراعاسى ە.ەسقاليەۆ اۋرۋحانالار مەن پروۆيزورلىق ورتالىقتاردى ءدارى-دارمەكپەن قامتاماسىز ەتۋ ءۇشىن دارىلىك پرەپاراتتاردىڭ 91 اتاۋى جەتكىزىلەتىنىن باياندادى.

وتكەن ايدا مەديتسينالىق پرەپاراتتار وڭىرلەر بويىنشا 8,7 ملرد تەڭگەگە ءبولىندى. اۋرۋحانالاردىڭ قاجەتتىلىگىن قامتاماسىز ەتۋ ءۇشىن جەدەل تۇردە قوسىمشا ءدارى-دارمەكتەر ساتىپ الىندى، ەمدەلۋشىلەر امبۋلاتوريالىق دەڭگەيدە تەگىن الا الاتىن ءدارى-دارمەكتەر ءتىزىمى كەڭەيتىلدى (پاراتسەتامول، يبۋپروفەن، ريۆاروكسابان، دابيگاتران جانە اپيكسابان ەنگىزىلدى).

COVID-19-دىڭ ەكىنشى تولقىنى باستالا قالسا، كومپانيادا 24 ملرد تەڭگە سوماسىنا ەكى ايلىق ءدارى-دارمەك قورى قۇرىلۋدا، سونداي-اق كارانتين كەزەڭىندە جەكەمەنشىك ءدارىحانالاردى نارىق ءوز بەتىنشە تولىقتىرا المايتىن 19 تاپشى ءدارى-دارمەكپەن جابدىقتاۋ ماسەلەسى پىسىقتالىپ جاتىر. «سق-فارماتسيا» ولاردى قالالار مەن اۋىلدىق ەلدى مەكەندەردەگى ءار دارىحاناعا دەيىن تولىق جەتكىزەدى.

ۇكىمەت باسشىسىنا كومپانيانىڭ لوگيستيكاسىن جاقسارتۋ شارالارى تۋرالى باياندالدى: جوسپارلى رەيستەر سانى 1,7 ەسەگە ارتتى، تيەۋ مەرزىمى 2 اپتادان 1 اپتاعا دەيىن قىسقارتىلدى، تاۋارلاردى حابتاردان وڭىرلەرگە ءبولۋ Cross-docking قاعيداتى بويىنشا جۇزەگە اسىرىلادى، ال قويمالاردىڭ جۇمىسى 24/7 رەجيمىنە كوشىرىلدى.

پرەمەر-مينيستر وڭىرلەرگە ءدارى-دارمەكتەردىڭ تيەلۋىن ەرەكشە باقىلاۋعا الۋدى، كۇزگى-قىسقى ماۋسىمدا COVID-19-دان ەمدەۋ ءۇشىن بارلىق قاجەتتى مەديتسينالىق پرەپاراتتاردىڭ بولۋىن قامتاماسىز ەتۋدى، ءدارى-دارمەكتەرگە قاجەتتىلىك ارتقان جاعدايدا شۇعىل ارەكەت ەتۋدى، سونداي-اق بولشەك ساۋدا سەكتورىن تاپشى ءدارى-دارمەكپەن تولىقتىرۋ بويىنشا تاپسىرمانى ورىنداۋدى قامتاماسىز ەتۋدى تاپسىردى.

مەديتسينالىق ونىمدەر مەن دارىلىك پرەپاراتتاردى وتاندىق وندىرۋشىلەردى قولداۋ بويىنشا جۇيەلى شارالاردى قابىلداۋ قاجەتتىگىنە ەرەكشە نازار اۋدارىلدى.

«سق-فارماتسيا» لوگيستيكالىق حابىن ارالاۋعا پرەمەر-ءمينيستردىڭ ورىنباسارى ە.توعجانوۆ، يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ، دەنساۋلىق ساقتاۋ ءمينيسترى ا. تسوي، دەنساۋلىق ساقتاۋ ۆيتسە-ءمينيسترى ل.بيۋرابەكوۆا قاتىستى.

سوڭعى جاڭالىقتار