5 تامىز, 10:01 482 0 جاڭالىقتار اسىل تۇمار

قۇس تۇماۋى: قازاقستان رەسەيمەن شەكاراعا شەكتەۋ قويدى

سۋرەت عالامتوردان الىندى
سۋرەت عالامتوردان الىندى

قر اۋىل شارۋاشىلىعى مينيسترلىگىنىڭ رەسمي سايتى قازاقستان H5N8 قاۋىپتى ۆيرۋسى بەلگىلەرىنىڭ تابىلۋىنا بايلانىستى رەسەي فەدەراتسياسىمەن شەكاراعا شەكتەۋ قويعانىن حابارلادى. 

مينيسترلىكتىڭ سايتىندا قۇس تۇماۋىمەن بايلانىستى ەرەكشە قاۋىپ ايماعى – قازاقستاننىڭ سولتۇستىك-باتىسى ەكەنى ايتىلعان.

«بيىل 3-4 تامىزىندا ۆەتەرينارلىق جانە فيتوسانيتارلىق قاداعالاۋ بويىنشا فەدەرالدى قىزمەتتىڭ چەليابىدەگى باسقارماسى ايماقتا انىقتالعان قۇس تۇماۋى ۆيرۋسىنىڭ گەنەتيكالىق بەلگىلەرى تۋرالى اقپارات تاراتتى. ءولى قۇستاردان الىنعان بارلىق سىنامالاردا H5N8 تۇماۋى ۆيرۋسىنىڭ كىشى ءتۇرى انىقتالدى. قۇستاردىڭ بارلىق ءتۇرى تۇماۋدى تەز قابىلدايتىنى بەلگىلى. بۇل اۋىل شارۋاشىلىق، سينانتروپتى جانە جابايى قۇستارعا جىلدام جۇعاتىن ءارى لەزدە تارايتىن ۆيرۋستىق اۋرۋ. سوندىقتان، قۇس تۇماۋىنىڭ جاپپاي تارالىپ كەتۋ قاۋپى بار»، – دەلىگەن حابارلامادا.

وسىعان بايلانىستى، ۋۆەل اۋدانارالىق ۆەتەرينارلىق زەرتحاناسى، چەليابى سىناق زەرتحاناسى جانە ۆلاديمير قالاسىنداعى جانۋارلاردىڭ دەنساۋلىعىن ساقتاۋ فەدەرالدى ورتالىعى جاساعان دياگنوز نەگىزىندە، قازاقستان اۋماعىندا ەپيزووتيكالىق تالاپتاردى ساقتاۋ ماقساتىندا، قر اۋىل شارۋاشىلىعى مينيسترلىگىنىڭ ۆەتەرينارلىق باقىلاۋ جانە قاداعالاۋ كوميتەتى 2020 جىلدىڭ 4 تامىزىنان باستاپ چەليابى وبلىسىنان تەرميالىق وڭدەۋدەن وتپەگەن قۇستارعا ارنالعان جەمشوپ قوسپالارى (حيميالىق جانە ميكروبيولوگيالىق سينتەزدىڭ قوسپالارىنان باسقا), تاكسيدەرميالىق وڭدەۋدەن وتپەگەن اۋلانعان اڭ-قۇستار ء(تىرى قۇستار، جۇمىرتقالار، قۇس ەتى جانە قۇس ەتىنىڭ بارلىق تۇرلەرى), سونىمەن قاتار قۇستاردى ۇستاۋعا، سويۋعا جانە كەسۋگە قولدانىلاتىن قۇرال-جابدىقتار اكەلۋگە جانە تاسىمالداۋعا ۋاقىتشا شەكتەۋ ەنگىزدى.

شەكارالاس ايماقتارداعى ەپيزوتيالىق جاعدايدى وبلىستاردىڭ ۆەتەرينارلىق قىزمەتى ەرەكشە باقىلاۋعا الدى. H5N8 ادامدار ءۇشىن تومەن پاتوگەندى دەپ سانالعانىمەن، عالىمداردىڭ پىكىرىنشە، ول تەز وزگەرىسكە ۇشىراپ، تۇماۋدىڭ باسقا تۇرىمەن اۋىرعان جاعدايدا ولىمگە اكەپ سوعۋى مۇمكىن.

سوڭعى جاڭالىقتار