4 تامىز, 17:15 510 0 جاڭالىقتار اسىل تۇمار

ماسكا تاعۋدان باس تارتقان جولاۋشى اۋە رەيسىنەن ءتۇسىرىلدى

سۋرەت عالامتوردان الىندى
سۋرەت عالامتوردان الىندى

اتىراۋ قالاسى اۋەجايىنداعى جەلىلىك پوليتسيا بولىمشەسىنە «Qazaq Air» اق اۋەكومپانياسىنىڭ وكىلىنەن «اتىراۋ-اقتاۋ» باعىتىنداعى ۇشاققا وتىرعىزۋ كەزىندە ءتارتىپ بۇزعان جولاۋشى انىقتالعانى تۋرالى حابارلاما ءتۇستى.

كولىكتەگى پوليتسيا دەپارتامەنتى باسشىسىنىڭ ءبىرىنشى ورىنباسارى قاليجان قوبلانديننىڭ حابارلاۋىنشا، تەكسەرىس كەزىندە پوليتسەيلەر كوماندير مەن ەكيپاج مۇشەلەرىنىڭ ايتقانىن ورىنداماي، ماسكا تاعۋدان باس تارتىپ كارانتين ەرەجەسىن بۇزعان 60 جاستاعى اقتوبە قالاسىنىڭ تۇرعىنىن انىقتادى. ساراپتاما بارىسىندا ازاماتتىڭ ىشىمدىك ىشكەنى انىقتالدى. تارتىپكە باعىنباعان جولاۋشىنى ۇشاقتان ءتۇسىرىپ تاستادى.

«ءتارتىپ بۇزۋشىعا قاتىستى قر اقبتك- ءنىڭ 440-بابىنىڭ 1-بولىگى (الكوگولدىك ىشىمدىكتەردى ءىشۋ نەمەسە قوعامدىق ورىندارعا ماساڭ كۇيدە كەلۋ) جانە قر اقبتك-ءنىڭ 566-بابى (ۇشاقتا ءوزىن-ءوزى ۇستاۋ ەرەجەلەرىن بۇزۋ) بويىنشا اكىمشىلىك حاتتاما تولتىرىلىپ، 8 اەك (22 224 تەڭگە-رەد.) كولەمىندە ايىپپۇل سالىندى»، – دەدى پوليتسيا پولكوۆنيگى.

سونداي-اق جولاۋشىعا قاتىستى قر اقبتك-ءنىڭ 425-بابى (حالىقتىڭ سانيتارلىق-ەپيدەميولوگيالىق سالاۋاتتىلىعى سالاسىنداعى زاڭناما تالاپتارىن، سونداي-اق گيگيەنالىق نورماتيۆتەردى بۇزۋ) بويىنشا اكىمشىلىك حاتتاما تولتىرىلىپ، ول اتىراۋ بولىمشەلىك كولىكتەگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جىبەرىلدى.

سوڭعى جاڭالىقتار