4 تامىز, 14:01 707 0 جاڭالىقتار اسىل تۇمار

جول ساپاسىنا جاۋاپتى 13 شەنەۋنىك جازالاندى

سولتۇستىك قازاقستان وبلىسىندا اۆتوكولىك جولدارى، كوشە-جول توراپتارى تەكسەرىلىپ، ءوز ىسىنە سالاق قاراعان 13 لاۋازىمدىق تۇلعا جاۋاپقا تارتىلدى، – دەپ جازدى قازاقپارات.

سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە، اكىمشىلىك پوليتسيا باسقارماسى جىلىنا ەكى رەت اۆتوكولىك جولدارىنا، كوشە-جول توراپتارىنا جانە قۇرىلىستارىنا كەشەندى تەكسەرۋ جۇرگىزەدى.

ماماندار اۆتوجولداردىڭ تەحنيكالىق جاعدايىن، جول ينفراقۇرىلىمىنىڭ ەرەجەلەر مەن ستاندارتتارعا سايكەستىگىن جانە جاڭعىرتۋ جۇمىستارى جۇرگىزىلىپ جاتقان جولداردان باسقا رەسپۋبليكالىق ماڭىزى بار تاس جولداردى ينسپەكتسيالايدى.

كەزەكتى تەكسەرۋ بارىسىندا 1 مىڭ 700 استام جول بەلگىسى مەن باعىتتىق كورسەتكىشتەردى ورناتىپ-اۋىستىرۋ، سونداي-اق 18 اۆتوبۋس پاۆيلونى مەن تۇراقتاردى جوندەۋ قاجەتتىلىگى انىقتالدى. 26 كوپىر مەن جول بويىنداعى سىمداردى تەكسەرۋ كەزىندە 71 اقاۋ تابىلدى. تەكسەرىس ناتيجەسى بويىنشا بارلىق مۇددەلى ورگاندارعا ۇسىنىمدار جولداندى.

ماسەلەن پەتروپاۆلداعى 101 باعدارشامنىڭ 32-ءسىن ستاندارتقا ساي قوسىمشا جاراقتاندىرۋ قاجەت.

«جول قوزعالىسىنىڭ قاۋىپسىزدىگى كوپتەگەن فاكتورلارعا بايلانىستى. سونىڭ ىشىندە جولدىڭ جاعدايىنا، كورىنۋىنە، جول بەلگىلەرىنىڭ ورنالاسۋ جۇيەسىنە. قالالىقتاردان قوسىمشا جول بەلگىلەرىن جانە جاياۋ جۇرگىنشىلەر جولاقتارىن ورناتۋ تۋرالى ۇسىنىستار ءجيى ءتۇسىپ جاتادى. ولاردىڭ تەك بەلگىلەنگەن ەرەجە مەن ستاندارتتارعا ساي ورناتىلاتىنىن ەسكەرگەن ءجون. پوليتسيا دەپارتامەنتىنە نەمەسە الەۋمەتتىك جەلىگە كەلىپ تۇسەتىن ءار ءوتىنىش جان-جاقتى قاراستىرىلادى. اكىمشىلىك پوليتسيا قىزمەتكەرلەرى جول-كولىك تورابىن جەتىلدىرۋ ماقساتىندا كەز كەلگەن مۇمكىندىكتى پايدالانادى»، – دەيدى سقو پد اكىمشىلىك پوليتسيا باسقارماسىنىڭ ەرەكشە تاپسىرمالار جونىندەگى اعا ينسپەكتورى ەۆگەني گوكين.

ءتارتىپ ساقشىلارىنىڭ ايتۋىنشا، بەلوە اۋىلى ماڭىنداعى چەليابى-ءنوۆوسىبىر تاس جولىن جارىقتاندىرۋ، بەسكول اۋىلىنىڭ ورتالىعىنداعى تاس جول ۇستىنەن جول وتكەلىن سالۋ، ەكاتەرينبۋرگ-الماتى، جەزقازعان-پەتروپاۆل جولدارىن كەڭەيتۋ تۋرالى ۇسىنىستار بار.

جالپى كەشەندى تەكسەرۋ كەزىندە جولدى جانە جول قۇرىلىستارىن كۇتىپ-ۇستاماۋعا قاتىستى مىڭنان استام كەمشىلىك انىقتالىپ، 13 لاۋازىمدى تۇلعا جاۋاپقا تارتىلدى.

سوڭعى جاڭالىقتار