3 تامىز, 16:11 575 0 زاڭ انار لەپەسوۆا

الماتى وبلىسىنىڭ تۇرعىنى كيىك ءمۇيىزىن ساتۋ ۇستىندە ۇستالدى

الماتى وبلىسىنىڭ تۇرعىنى كيىك ءمۇيىزىنىڭ ءتورت داناسىن وتكىزۋ كەزىندە ۇستالعان،  دەپ حابارلايدى Polisia.kz.

كولىك قۇرالىن ءتىنتۋ بارىسىندا ودان وزگە تاعى بەس ءمۇيىز اۆتوكولىكتىڭ استىنان تابىلدى.

"بەلگىسىز ەر ادامنىڭ كيىك مۇيىزدەرىن ساتقىسى كەلەتىنى تۋرالى بىزگە جەدەل اقپارات كەلىپ ءتۇستى. اقپارات بىردەن جۇمىسقا قابىلداندى. وسىلايشا، ءبىرشاما ۋاقىتتان كەيىن تالدىقورعان قالاسىندا ارنايى وپەراتسيا بارىسىندا تەكەلى قالاسىنىڭ 46 جاستاعى تۇرعىنى اقشالاي قاراجاتتى بەرۋ كەزىندە ۇستالدى. قر قك 339-بابىنىڭ 1-1-ب. سايكەس باستالعان سوتقا دەيىنگى تەرگەۋ امالدارى بارىسىندا ۇستالعان ازاماتتىڭ كيىك ءمۇيىزىن قايدان ساتىپ العانى جانە قانداي ماقساتپەن ساتۋعا شەشىم قابىلداعانى انىقتالاتىن بولادى. بارلىق تابىلعان زاتتاي دالەلدەمەلەر الىنىپ، جالپى سانى توعىز كيىك ءمۇيىزى ساراپتاماعا جىبەرىلدى", – دەپ حابارلايدى الماتى وبلىسى پد كريمينالدىق پوليتسيا باسقارماسىنىڭ باستىعى اسحات دانيار.

پوليتسيا ۇستالعان ازاماتتىڭ ءىس-ارەكەتىندە قىلمىس بەلگىلەرى بايقالاتىنىن ەسكە سالادى، بۇل كيىكتى زاڭسىز اۋلاۋ، جويۋ، سونداي-اق زاڭسىز اۋلانعان كيىكتى نەمەسە ونىڭ دەريۆاتتارىن، ونىڭ ىشىندە مۇيىزدەرىن ساتىپ الۋ، ساقتاۋ، وتكىزۋ، اكەلۋ، اكەتۋ، جونەلتۋ، تاسىمالداۋ ارەكەتتەرى. قىلمىستىڭ بۇل ءتۇرى ءۇش جىلدان بەس جىلعا دەيىنگى مەرزىمگە باس بوستاندىعىن شەكتەۋ نەمەسە مۇلكى تاركىلەنىپ، سول مەرزىمگە باس بوستاندىعىنان ايىرۋ تۇرىندەگى جازانى كوزدەيدى.

سوڭعى جاڭالىقتار