3 تامىز, 12:24 524 0 دەنساۋلىق انار لەپەسوۆا

جاڭا ستاتيستيكا نەلىكتەن 1 تامىزدا جاريالاندى – ا.تسوي ءتۇسىندىردى

قازاقستان ددسۇ-نىڭ سوڭعى ستاندارتتارىنا ساي كوروناۆيرۋس پەن پنەۆمونيا ستاتيستيكاسىن بىرىكتىرۋ جۇمىستارىن نەگە كەشىكتىردى؟ بۇل ساۋالعا دەنساۋلىق ساقتاۋ ءمينيسترى الەكسەي تسوي جاۋاپ بەردى. 

«دۇنيەجۇزىلىك دەنساۋلىق ساقتاۋ ۇيىمىنىڭ كەڭەسىمەن ءبىز 2020 جىلدىڭ 1 تامىزىنان باستاپ كۆي مەن پنەۆمونيا بويىنشا ستاتيستيكانىڭ بىرىكتىرۋ تۋرالى شەشىم قابىلدادىق. كوپ ادام ددسۇ بۇل تۋرالى 18 شىلدەدە حابارلاسا، قازاقستان ستاتيستيكانى نەلىكتەن 1 تامىزدان باستادى دەيدى. سەبەپ مىنادا: بىزگە كوديروۆكا مەن پاتسيەنتتەردى تىركەۋ جۇيەسىنىڭ سەنىمدىلىگىن قامتاماسىز ەتۋ الگوريتمىن ازىرلەۋ ءۇشىن، قازىرگى اقپاراتتىق جۇيەنى باپتاپ، جاڭا مالىمەتتەردى ەنگىزۋ ءۇشىن پەرسونالدى دايىنداۋعا ەكى اپتاعا جۋىق ۋاقىت كەرەك بولدى. بۇل وتە كۇردەلى ءارى كوپ كۇشتى تالاپ ەتەتىن شارۋا»، - دەدى مينيستر.

الەكسەي تسويدىڭ تۇسىندىرۋىنشە، كوروناۆيرۋس جۇقتىرعانى پتر-تەست ارقىلى راستالماعان (پنەۆمونيا) ناۋقاستاردى انىقتاۋ كۇردەلى جۇمىس. از ۋاقىت ىشىندە كوروناۆيرۋس پنەۆمونياسىنىڭ بەلگىلەرىن انىقتاپ، ونى ەسەپ جۇيەسىنە تىركەۋ ءۇشىن دارىگەرلەر بار كۇشىن سالىپتى. بۇدان بىلاي جاڭا ستاتيستيكا ددسۇ ستاندارتتارىنا ساي جۇرگىزىلمەك. 

ەسكە سالا كەتەيىك، قر پرەزيدەنتى قاسىم-جومارت توقاەۆ ۇكىمەتكە پاندەميانىڭ ستاتيستيكاسىن بىرىزدەندىرۋدى تاپسىرعان بولاتىن.

دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆتىڭ ايتۋىنشا, ىندەت جۇقتىرعاندار جايلى جاڭا مالىمەتتەر 4 تسيفرعا نەگىزدەلەدى.

 

سوڭعى جاڭالىقتار