1 تامىز, 18:44 555 0 جاڭالىقتار انار لەپەسوۆا

COVID-19: وڭتۇستىك امەريكا ەلدەرىندە ىندەت ءورشىدى

وڭتۇستىك امەريكا ەلدەرىندە كوروناۆيرۋس ءورشىپ بارادى. ىندەتتىڭ تارالۋ قارقىنى ارتقان مەملەكەتتەر شەكتەۋ شارالارىن كۇشەيتۋگە ءماجبۇر. 

پەرۋدە توتەنشە جاعداي رەجيمى تاعى ءبىر ايعا ۇزارتىلدى. ويتكەنى ەلدە ىندەتتىڭ بەتى قايتار ەمەس. 30 شىلدە كۇنى ەل اۋماعىندا كوروناۆيرۋس جۇقتىرعان 7 مىڭداي ادام انىقتالدى. پەرۋ اۋرۋحانالارى ناۋقاستارعا لىق تولى، اۋىرعان ادامدارعا كومەك بەرەتىن دارىگەرلەر قات.

پەرۋ كوروناۆيرۋستى جۇقتىرۋ سانى بويىنشا وڭتۇستىك امەريكادا برازيليادان كەيىن ەكىنشى تۇر. 33 ميلليون حالقى بار بۇل ەلدە 400 مىڭنان اسا ادام ىندەتكە شالدىققان. ال قايتىس بولعانداردىڭ سانى 19 مىڭنان اسىپ جىعىلدى. اق حالاتتىلاردىڭ پىكىرىنشە، شىنايى ستاتيستيكا بۇدان الدەقايدا كوپ بولۋى مۇمكىن. ويتكەنى كوپتەگەن جاعدايدا ءولىم سەبەبى رەتىندە كوروناۆيرۋس سالدارىنان اسقىنعان وزگە اۋرۋلار جازىلعان.

پەرۋ دەنساۋلىق ساقتاۋ ءمينيسترى پيلار ماتستسەتتيدىڭ ايتۋىنشا، ءتۇرلى سەبەپتەردەن قايتىس بولعان 46 مىڭ ادامدا كوروناۆيرۋس انىقتالعان. اتالعان دەرەكتەر بويىنشا  كوميسسيا تالداۋ جۇمىستارىن جۇرگىزىپ جاتقان كورىنەدى.

بوليۆيادا دا قاتاڭ شەكتەۋ شارالارى تاعى ءبىر ايعا ۇزارتىلدى. وڭتۇستىك امەريكاداعى ەڭ كەدەي مەملەكەتتەردىڭ ءبىرى سانالاتىن بۇل ەلدە دەنساۋلىق ساقتاۋ جۇيەسى ىندەتپەن كۇرەسۋگە قاۋقارسىز. اۋىرعانداردىڭ كوبى ءوز ۇيلەرىندە ەمدەلۋدە.

پاندەميا باستالعالى 11 ميلليون حالقى بار بوليۆيادا 75 مىڭنان اسا ادام كوروناۆيرۋس جۇقتىرعان. ناۋقاستاردىڭ 3 مىڭى كوز جۇمدى.

ەسكە سالا كەتەيىك، دۇنيەجۇزىلىك دەنساۋلىق ساقتاۋ ۇيىمى ءبىر تاۋلىك ىشىندە كوروناۆيرۋس ىندەتىن جۇقتىرۋ كورسەتكىشى بويىنشا جاڭا رەكورد تىركەدى.

سوڭعى تاۋلىكتە الەمدە 292 مىڭنان استام ادامنان كوروناۆيرۋس انىقتالعان. بۇعان دەيىن قاتەرلى ۆيرۋستى جۇقتىرعاندار بويىنشا ەڭ كوپ ادام 25 شىلدەدە تىركەلگەن. سول كۇنى 286 مىڭ ادامنان ۆيرۋس انىقتالعان ەدى.

سوڭعى جاڭالىقتار