30 شىلدە, 13:35 608 0 ساياسات انار لەپەسوۆا

مەملەكەتتىك كوميسسيا وتىرىسى: پرەمەر-مينيستر كاسىپكەرلەردى قولداۋ شارالارىن ازىرلەۋدى تاپسىردى

قر پرەمەر-ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا قر پرەزيدەنتى قاسىم-جومارت توقاەۆتىڭ كارانتيندىك شارالاردى ۇزارتۋ جانە كارانتيننەن كەيىنگى كەزەڭگە دايىندىق جونىندەگى تاپسىرماسىنىڭ ورىندالۋ ماسەلەلەرى قارالدى.

بۇل تۋرالى primeminister.kz حابارلادى.

ەلىمىزدەگى ەپيدەميولوگيالىق احۋال، حالىق پەن بيزنەستى قولداۋ شارالارى تۋرالى قر دەنساۋلىق ساقتاۋ ءمينيسترى ا. تسوي، «اتامەكەن» ۇكپ توراعاسى ا. مىرزاحمەتوۆ، قر قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ن. ءابدىراحمانوۆ، قر ەڭبەك جانە حالىقتى الەۋمەتتىك قورعاۋ ءمينيسترى ب. نۇرىمبەتوۆ، الماتى قالاسىنىڭ اكىمى ب. ساعىنتاەۆ باياندادى.

ۇكىمەت باسشىسى الداعى ەكى اپتا ىشىندە ءوز قىزمەتىن ۋاقىتشا توقتاتقان ەكونوميكا سالالارىنىڭ قىزمەتىن قالپىنا كەلتىرۋ بويىنشا جۇيەلى دايىندىق جۇمىستارىن جۇرگىزۋدى تاپسىردى.

ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن، «اتامەكەن» ۇكپ-مەن بىرلەسىپ، كاسىپكەرلەرگە قولداۋ كورسەتۋ شارالارىن ازىرلەۋ تاپسىرىلدى.

ەڭ كوپ زارداپ شەككەن سالالارداعى شوب سۋبەكتىلەرىنە مەملەكەتتىك قولداۋ شاراسى رەتىندە نەسيە تولەمدەرىن وسى جىلدىڭ 1 قازانىنا دەيىنگى مەرزىمگە كەيىنگە قالدىرۋ مۇمكىندىگى ۇسىنىلادى.

پرەمەر-مينيستر بيزنەس سۋبەكتىلەرىنىڭ قىزمەتىنە قويىلاتىن سانيتارلىق-ەپيدەميولوگيالىق تالاپتاردى بەكىتۋدى، سونداي-اق ازاماتتار مەن كاسىپكەرلىك سۋبەكتىلەرىنىڭ سانيتارلىق ەرەجەلەردى ساقتاۋىنا ءتيىستى باقىلاۋ جاساۋدى تاپسىردى.

كاسىپورىننىڭ جۇمىسىنا سالىنعان تىيىمدى الىپ تاستاۋ الگوريتمى كاسىپكەرلەردى تىركەۋدى جانە «Info Kazakhstan» ەلەكتروندىق پلاتفورماسىندا قىزمەتتى قايتا باستاۋعا وتىنىمدەر قابىلداۋدى قامتيدى. اكىمدىك، سەق، وڭىرلىك كاسىپكەرلەر پالاتاسى قىزمەتكەرلەرى مەن جۇرتشىلىق وكىلدەرىنەن قۇرالعان كوميسسيا تەكسەرگەننەن كەيىن بيزنەس سۋبەكتىلەرىنە قىزمەتىن قايتا باستاۋعا ەلەكتروندىق رۇقسات بەرىلەدى.

تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە كوروناۆيرۋس ينفەكتسياسىنىڭ الدىن الۋ جانە اقپاراتتاندىرۋدى ارتتىرۋ بويىنشا ءموبيلدى قوسىمشالاردى ەنگىزۋ تاپسىرىلدى.

 

سوڭعى جاڭالىقتار