16 شىلدە, 17:54 445 0 جاڭالىقتار اسىل تۇمار

COVID-19: انتيدەنەنى انىقتايتىن اۋقىمدى زەرتتەۋ جۇرگىزىلمەك

قر دسم تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ كوروناۆيرۋس بويىنشا تەستتەن وتكىزۋ ماسەلەلەرى جايلى جاڭالىقتارمەن ءبولىستى.

«وسى ايدىڭ ماۋسىمىنان بەرى ۆيرۋس جۇقتىرعانداردىڭ ارتۋىن ەسەپكە الا وتىرىپ، ءبىز تەستىلەۋدىڭ وزىندىك امال-ادىستەرىن قايتا قارادىق. جرۆي جانە پنەۆمونيا سەكىلدى اۋرۋلار انىقتالعان جاعدايلارعا باسىمدىق بەرە باستادىق. ازاماتتاردىڭ ءوز تالاپ-تىلەگىمەن زەرتتەۋدەن ءوتۋى كەزىنتە بەلگىلى ءبىر دەفيتسيتتىڭ بولعانىن بىلەمىز. اقىلى نەگىزدە – جەكە نەمەسە مەملەكەتتىك زەرتحانالاردا دا سولاي بولدى. قازاقستاندا قازىرگى ۋاقىتتا باسقا ەلدەردەن قاراعاندا تەست كوپ مولشەردە جۇرگىزىلەدى»، – دەدى ول.

كوميتەت توراعاسى ۇكىمەت رەزەرۆى ارقىلى وتاندىق جانە شەتەلدىك تاۋار وندىرۋشىلەردەن تاعى 1,2 ملن پتر-تەست جۇيەسى ساتىپ الىنعالى جاتقانىن ەسكە سالدى.

سونىمەن قاتار تيمۋر سۇلتانعازيەۆ قازاقستان دۇنيەجۇزىلىك دەنساۋلىق ساقتاۋ ۇيىمىمەن بىرگە كوروناۆيرۋس بويىنشا انتيدەنەلەردى انىقتاۋعا بايلانىستى زەرتتەۋ جۇرگىزگەلى جاتقانىن ايتىپ ءوتتى.

«دۇنيەجۇزىلىك دەنساۋلىق ساقتاۋ ۇيىمىمەن بىرگە ەپيدەميولوگيالىق زەرتتەۋدى جۇرگىزۋ جوسپاردا بار. زەرتتەۋ ماڭىزىن ەسكەرە وتىرىپ، انتيدەنەلەردى زەرتتەۋ جۇمىسى باس مەملەكەتتىك سانيتارلىق دارىگەردىڭ قاۋلىسىنا، دياگنوستيكا مەن ەمدەۋدىڭ كلينيكالىق حاتتاماسىنا ەنگىزىلگەن»، –دەدى ول.

سوڭعى جاڭالىقتار