16 شىلدە, 16:15 378 0 جاڭالىقتار اسىل تۇمار

مەديتسينا قىزمەتكەرلەرىنە 2 ملن تەڭگەدەن وتەماقى تولەنە باستادى

قازاقستاندا كوروناۆيرۋس ينفەكتسياسىن جۇقتىرعان مەديتسينا قىزمەتكەرلەرىنە وتەماقى تولەۋ باستالدى. بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى.

«بۇل وتەماقى دەنساۋلىق ساقتاۋ مەن ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ بىرلەسكەن بۇيرىعىنا سايكەس تولەنەدى. تولەم وپەراتورى رەتىندە مەملەكەتتىك الەۋمەتتىك ساقتاندىرۋ قورى بەكىتىلگەن. وتەماقى تولەۋگە وتىنىشتەردى وڭىرلىك دەنساۋلىق ساقتاۋ باسقارمالارى كوميسسيانىڭ ءتيىستى شەشىمدەرى نەگىزىندە جىبەرەدى»، – دەپ اتاپ ءوتتى مينيستر.

ءمينيستردىڭ ايتۋىنشا، بۇگىن ساعات 14:00-دەگى جاعداي بويىنشا، وتەماقى تولەۋگە 6 وڭىردەن 123 ءوتىنىش كەلىپ تۇسكەن.

«ەرەجە بويىنشا ءۇش جۇمىس كۇنىندە مەملەكەتتىك الەۋمەتتىك ساقتاندىرۋ قورى بۇل ازاماتتارعا 2 ملن تەڭگەدەن تولەۋى ءتيىس. قاراجات وتىنىمدە كورسەتىلگەن رەكۆيزيتتەرگە جىبەرىلەدى. 123 ءوتىنىم ىشىندە قىزمەت بابىمەن قايتىس بولعان مەديتسينا قىزمەتكەرلەرى جوق. ولار بويىنشا ءالى ءوتىنىم بەرىلمەدى»، – دەدى ب.نۇرىمبەتوۆ.

ەسكە سالا كەتسەك، قىزمەت بارىسىندا كوروناۆيرۋس ينفەكتسياسىن جۇقتىرعان مەديتسينا قىزمەتكەرىنە – 2 ملن تەڭگەدەن، قايتىس بولعان قىزمەتكەردىڭ وتباسىنا 10 ملن تەڭگە وتەماقى بەكىتىلگەن ەدى.

سوڭعى جاڭالىقتار