16 شىلدە, 12:40 397 0 دەنساۋلىق انار لەپەسوۆا

COVID-19: قازاقستاندا 306 ناۋقاس اۋىر حالدە جاتىر

قازاقستاندا كوروناۆيرۋسقا شالدىققان 306 ادامنىڭ جاعدايى اۋىر. ونىڭ ىشىندەگى 41 ناۋقاستىڭ احۋالىن ماماندار وتە اۋىر دەپ باعالاپ وتىر. بۇل تۋرالى قر دسم تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ مالىمدەدى. 

«قازىرگى ۋاقىتتا اۋىر جاعدايداعى ناۋقاستارىمىز جانساقتاۋ مەن انەستەزيولوگيا بولىمىندە ەمدەلىپ جاتىر. ولاردىڭ سانى – 306 ادام. اۋىر جاعدايدا 265 سىرقات، وتە اۋىر جاعدايداعى 41 ناۋقاس بار. وكپەنى جاساندى جەلدەتۋ اپپاراتىنا قوسىلعان 67 ناۋقاس (كوروناۆيرۋس جۇقتىرعان) ەم قابىلداۋدا. ءينۆوزيۆتى ەمەس وكپەنى جاساندى جەلدەتۋ اپپاراتىندا 133 سىرقات جاتىر. وزىنشە دەمالاتىن وكسيگەنوتەراپيا الىپ جاتقان سىرقاتتاردىڭ سانى – 106. ءوز بەتىنشە دەمالاتىن ناۋقاستاردىڭ سانى – 9265 ناۋقاس»، - دەدى كوميتەت توراعاسى.

ت.سۇلتانعازيەۆتىڭ سوزىنشە،  وسى جارتى جىلدىقتا قازاقستاندا 98 مىڭ ادام ادام پنەۆمونياعا شالدىققان. وتكەن جىلمەن سالىستىرعاندا ءوسىم 50 پايىزدان اسقان.

ەسكە سالا كەتەيىك، بۇعان دەيىن قر دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا ەلىمىزدە وكپە قابىنۋى كوروناۆيرۋس ستاتيستيكاسىندا نەلىكتەن ەسەپكە الىنبايتىندىعىن تۇسىندىرگەن بولاتىن.

«ءبىز قازىر حالىقارالىق ۇيىمدارمەن، دۇنيەجۇزىلىك دەنساۋلىق ساقتاۋ ۇيىمىمەن كەلىسسوز جۇرگىزىپ جاتىرمىز. بۇگىنگى كۇنى دسۇ ۇسىنىمىنا سايكەس، ستاتيستيكاعا پتر-ءدىڭ وڭ ناتيجەسى بار جاعدايلار عانا كىرىپ وتىر»، – دەدى ول.

 

سوڭعى جاڭالىقتار