16 شىلدە, 14:09 11314 0 دەنساۋلىق انار لەپەسوۆا

قازاقستاندا ىندەت قاشان توقتايدى – دارىگەر بولجامى

كوروناۆيرۋس ەپيدەمياسى قازاقستاندىقتاردىڭ بارلىعى دەرلىك اۋىرىپ شىققاننان كەيىن توقتايدى.  جوعارى ساناتتاعى دارىگەر، ينفەكتسيونيست، مەديتسينا عىلىمدارىنىڭ دوكتورى عاليا جۇمانباەۆا NV.kz باسىلىمىنا بەرگەن سۇقباتىندا وسىنداي بولجام جاسادى.

دارىگەردىڭ پىكىرىنشە، ىندەتتەن قۇتىلۋ ءۇشىن ۇجىمدىق يممۋنيتەت 70%-كە جەتۋى ءتيىس.

"ەپيدەميا ۇجىمدىق يممۋنيتەت 70%-كە جەتكەندە، ياعني حالىقتىڭ بارلىعى دەرلىك اۋىرىپ شىققاننان سوڭ توقتايدى. بىراق، يممۋنيتەت بارىندە بىردەي قالىپتاسپايدى، مىقتى ەمەس ءارى ۇزاققا سوزىلمايدى. ونىڭ ۇستىنە قۇرامىندا رنك بار ۆيرۋستىڭ مۋتاتسيالارىنا بەيىمدەلىپ ۇلگەرمەۋى مۇمكىن. وسىنىڭ بارلىعىن ەسكەرۋ قاجەت. سول سەبەپتى شامامەن ءۇش ايدان كەيىن ازاماتتار قايتادان اۋىرۋى مۇمكىن، تيىسىنشە، جاڭا كارانتين جاريالانادى. ويتكەنى يممۋنيتەت ورتا ەسەپپەن 3 ايعا عانا ساقتالادى", - دەدى جۇمانباەۆا.

دارىگەر ادامدى ۆيرۋستان نە قورعايتىنىن ايتتى.

"ۆيرۋستان ەڭ ءتيىمدى قورعانىش — ءبىزدىڭ يممۋنيتەتىمىز. ماسكا  — داۋلى تاقىرىپ. مەن كوشەدە بەتپەردەسىز جۇرۋگە بولادى دەپ سانايمىن. ال جابىق كەڭىستىكتە، ارينە، كيۋ قاجەت", - دەدى ينفەكتسيونيست.

وسى ورايدا جۇمانباەۆا كوروناۆيرۋس بەلگىلەرى بايقالاتىن پاتسيەنتتەرگە كەڭەس بەردى.

"بوسقا وتىرماي، تەزى ءارى ينتەنسيۆتى ەمدەلۋ قاجەت، ۆيرۋستان ءۇش قادام الدا جۇرگەن دۇرىس. پنەۆمونيا كەزىندە دەنە قىزۋى، جوتەل، قانداي دا ءبىر اۋرۋ بولماۋى مۇمكىن. ال كومپيۋتەرلىك توموگرافيا وكپەنىڭ 60 پايىزى زاقىمدالعانىن كورسەتىپ جاتادى. سوندىقتان بارلىق كەشەندى ەم شارالارىن قابىلداۋ كەرەك", -دەدى دارىگەر.

 

سوڭعى جاڭالىقتار