16 شىلدە, 08:56 463 0 زاڭ انار لەپەسوۆا

نۇر-سۇلتاندا ارنايى رەيد كەزىندە 17 ملن تەڭگەنىڭ ءدارى-دارمەگى تاركىلەندى

نۇر-سۇلتان قالاسىنىڭ پوليتسەيلەرى مەديتسينالىق پرەپاراتتاردى زاڭسىز ساتۋدى انىقتاۋ بويىنشا جۇرگىزىلگەن رەيد بارىسىندا ءدارى-دارمەك، سونىڭ ىشىندە قىتايدا شىعارىلعان پرەپاراتتاردى ساتۋشىلار انىقتالدى.

بۇل تۋرالى ەلوردالىق پوليتسيا دەپارتامەنتى حابارلادى.

قالانىڭ ورىنبور كوشەسىندە «فولكسۆاگەن» كولىگى توقتاتىلىپ، ونى تەكسەرۋ كەزىندە ىشىنەن قىتايدا جاسالعان «Lianhua» كاپسۋلالارىنىڭ 165 وراماسى انىقتالعان. بۇل پرەپاراتتى قازاقستان رەسپۋبليكاسىنىڭ اۋماعىندا پايدالانۋعا رۇقسات قۇجاتتار جوق. ۇستالعان جەرگىلىكتى تۇرعىن پرەپاراتتاردى سايتتاردىڭ بىرىنەن ساتىپ الىپ، ولاردى قالادا قايتا ساتپاق بولعانىن ايتتى. دارىلىك زاتتاردىڭ قايدان شىققانى انىقتالۋ ۇستىندە.

ەكىنشى وقيعادا يانۋشكەۆيچ كوشەسىندە كوپشىلىككە تاپشى بولعان «پاراتسەتامول»، «ينگاۆيرين»، «دەكسامەتازون»، «تسەفترياكسون»، «ليدوكاين»، «ەۋفيلين»، «سۋمامەد»، «تسيپرولەت» سياقتى دارىلىك زاتتاردى ساتپاق بولعان قالانىڭ 33 جاستاعى تۇرعىنى ۇستالدى.

ءۇشىنشى وقيعادا پوليتسەيلەر زاڭسىز اينالىمنان 6500 ماسكانى تاركىلەدى. رەيدتەر جۇرگىزىلە باستاعاننان بەرى پوليتسيا دەپارتامەنتىنىڭ قىزمەتكەرلەرى مەديتسينالىق پرەپاراتتار مەن قورعانىش قۇرالدارىن زاڭسىز ساتۋدىڭ 38 فاكتىسىن انىقتادى. ونىڭ ىشىندە 455 وراما ءدارى-دارمەك، 239 600 ماسكا، سونداي-اق دەنە قىزۋىن ولشەيتىن قۇرالدار، قورعانىش كوستيۋمدەرى، قولعاپتار، مەديتسينالىق باس كيىم، كوزىلدىرىك، انتيسەپتيكالىق قۇرالدار جانە وزگە دە بۇيىمدار بار. الىنعان مەديتسينالىق پرەپاراتتار مەن قورعانىش كيىمدەرىنىڭ جالپى سوماسى 16 825 985 تەڭگەنى قۇراعان.

ءاربىر انىقتالعان فاكتى بويىنشا قولدانىستاعى زاڭناماعا سايكەس قۇقىقتىق باعالاۋ بەرىلەدى.

 

 

سوڭعى جاڭالىقتار