15 شىلدە, 21:15 411 0 جاھان انار لەپەسوۆا

لوكداۋن: اۋستراليالىقتار التى اپتا بويى ۇيدە وتىرادى

اۋستراليانىڭ مەلبۋرن قالاسىندا سوڭعى تاۋلىكتە 200-گە جۋىق ادامنان كوروناۆيرۋس انىقتالدى. ىندەتتىڭ ورشۋىنە بايلانىستى ەل بيلىگى التى اپتالىق لوكداۋن ەنگىزۋ تۋرالى شەشىم قابىلدادى.  

Deutsche Welle باسىلىمىنىڭ حابارلاۋىنشا، مەلبۋرن تۇرعىندارى ءبىر جارىم اي بويى ۇيدە وتىرماق. ۆيكتوريا پروۆينتسياسىنىڭ پرەمەر-ءمينيسترى دەنيەل ەندريۋستىڭ سوزىنشە، جاعدايدى تۇراقتاندىرۋدىڭ باسقا جولى جوق.

«كوروناۆيرۋسقا بايلانىستى داعدارىس ءالى بىتكەن جوق. ءبىر تاۋلىكتە 191 ادامنان كوروناۆيرۋس انىقتالۋى – وتە قاۋىپتى كورسەتكىش. ەشكىم مۇنداي جاعدايعا تاپ بولامىز دەپ ويلاعان جوق. قابىلدانىپ وتىرعان شارالاردىڭ سالدارىنان ۇلكەن زالال كەلەتىنىن بىلەمىن. بىراق بۇدان باسقا امال قالمادى»، - دەدى ەندريۋس.

بەس ميلليوننان اسا تۇرعىنى بار مەگاپوليستىڭ بارلىق وقۋشىلارى قاشىقتان ءبىلىم الۋعا كوشەدى. مەيرامحانالار تەك تاپسىرىستى ۇيگە جەتكىزۋ قىزمەتىن كورسەتە الادى. ۆيكتوريا شتاتىنىڭ شەكارالارى جابىلدى. اۋماقتاعى شەكتەۋ شارالارىنىڭ ساقتالۋىن قاداعالاۋ ءۇشىن پوليتسيا مەن اسكەريلەر، شەكاراشىلار جانە پيلوتسىز ۇشاتىن قۇرىلعىلار جۇمىلدىرىلدى.

پاندەميا باستالعالى اۋستراليادا 10,5 مىڭ ادام كوروناۆيرۋس جۇقتىرعان. ىندەتتەن 111 ادام كوز جۇمدى.

ەسكە سالا كەتەيىك، بۇعان دەيىن مولدوۆادا توتەنشە جاعداي شىلدەنىڭ سوڭىنا دەيىن ۇزارتىلعانىن حابارلاعانبىز.

 

 

 

سوڭعى جاڭالىقتار