15 شىلدە, 19:42 793 0 جاڭالىقتار انار لەپەسوۆا

كارانتين كەزىندە توي جاساعاندار قىلمىستىق جاۋاپكەرشىلىككە تارتىلادى

كارانتيندىك شەكتەۋلەرگە قاراماستان توي جاساعانداردى قانداي جازا كۇتىپ تۇر؟ بۇل ساۋالعا ادىلەت ءمينيسترى مارات بەكەتاەۆ جاۋاپ بەردى.

«مۇنداي جاعدايدا ءتيىستى زاڭ بابىنا سايكەس، العاشقى جاعدايدا ايىپتالۋشىعا 83 مىڭ تەڭگە كولەمىندە ايىپپۇل سالىنادى. ەگەر مۇنداي شارالاردىڭ بارىسىندا ازاماتتار جاپپاي ۆيرۋس جۇقتىرسا، ايىپپۇلدىڭ دا كولەمى ايتارلىقتاي كوپ بولادى. ال وقيعانىڭ سالدارى جاعىمسىز جاعدايعا اپارسا، قىلمىستىق ءىس تە قوزعالۋى ىقتيمال»، - دەدى مينيستر.

سونداي-اق، ۆەدومستۆو باسشىسى كوكتەمگى كارانتين كەزىندە ءتارتىپ بۇزعاندارعا ايىپپۇل سالىنباۋ سەبەبىن ءتۇسىندىردى.

«ءتارتىپ قاتايا ءتۇستى. قازىرگى ۋاقىتتا بۇل ەرەجەلەر قوعامدىق ورىنداعى، جابىق نىساندارداعى جانە كولىكتەگى ازاماتتاردىڭ ارەكەتىنە بايلانىستى. «ولار ءوزىن قالاي ۇستاۋى كەرەك؟ ەرەجەنى بۇزسا، قالاي جازالانادى؟ زاڭبۇزۋشىعا قانداي اكىمشىلىك جازا تاعايىنداۋ كەرەك؟» دەگەن سۇراقتار توڭىرەگىندە پىكىرتالاس كوپ بولدى. كوكتەمدە قر اقبجك 476-بابى قولدانىلسا، قازىر 425-باپ بويىنشا ازاماتتار جازالانىپ جاتىر»، - دەدى م.بەكەتاەۆ.

ەسكە سالا كەتەيىك، ۇكىمەت ەپيدەميولوگيالىق احۋالدى ودان ارى تۇراقتاندىرۋ ءۇشىن شەكتەۋ شارالارىن تاعى ەكى اپتاعا، 20 شىلدەدەن باستاپ 2 تامىزعا دەيىن ۇزارتۋ تۋرالى شەشىم قابىلدادى.

مەملەكەتتىك كوميسسيانىڭ شەشىمى بويىنشا اتالمىش مەرزىمگە دەيىن ەلىمىزدە ويىن-ساۋىق، سپورت جانە باسقا دا بۇقارالىق ءىس-شارالاردى، سونداي-اق وتباسىلىق، ەسكە الۋ شارالارىن وتكىزۋگە تىيىم سالىنعان.

سوڭعى جاڭالىقتار