15 شىلدە, 18:51 373 0 ايماق انار لەپەسوۆا

ىندەتپەن كۇرەسىپ ءجۇرىپ كوز جۇمعان جامبىلدىق دارىگەرلەر مەملەكەتتىك ناگرادالارمەن ماراپاتتالدى

جامبىل وبلىسىنىڭ اكىمى بەردىبەك ساپارباەۆ مارقۇم دارىگەرلەردىڭ وتباسىلارىنا ارنايى باردى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ كوروناۆيرۋس ينفەكتسياcىمەن كۇرەسكە قوسقان ۇلەسى ءۇشىن جامبىلدىق مارقۇم بولعان دارىگەرلەردى قازاقستان رەسپۋبليكاسىنىڭ مەملەكەتتىك ناگرادالارمەن ناگرادتاۋ تۋرالى جارلىققا قول قويعان بولاتىن.

ايتالىق، قىزمەتتىك بورىشىن ۇلگىلى اتقارعانى، ازاماتتاردىڭ دەنساۋلىعىن ساقتاۋ جولىنداعى جانقيارلىق ەڭبەگى ءۇشىن I-دارەجەلى «بارىس» وردەنىمەن مارقۇم، جامبىل وبلىستىق فتيزيوپۋلمونولوگيا ورتالىعى باس دارىگەرىنىڭ ورىنباسارى داۋلەت ارىمباەۆ، «بارىس» ەكىنشى دارەجەلى وردەندەرىمەن مارقۇم، «الماز مەديكال گرۋپپ» جشس-ءنىڭ ءبولىم باسشىسى گۇلميرا قىرعىزاليەۆا مەن ءشۇ اۋداندىق ورتالىق اۋرۋحاناسىنىڭ باس دارىگەرى ايدار مۇقاتاەۆ ماراپاتتالدى.

جامبىل وبلىسىنىڭ اكىمى بەردىبەك ساپارباەۆ مەملەكەتتىك ناگرادالاردى د.ارىمباەۆ پەن گ.قىرعىزاليەۆانىڭ وتباسىلارىنا ارنايى بارىپ تاپسىردى.

«كوروناۆيرۋس ەڭ بىلىكتى دارىگەرلەردىڭ ولىمىنە سەبەپ بولۋدا. بۇل قازانىڭ ورنى تولمايدى. ولاردىڭ ەسىمدەرى مەن ەرلىكتەرى ەشقاشان ۇمىتىلمايدى. ولار تەرەڭ ءبىلىمدى، شىدامدىلىق پەن جانقيارلىقتى تالاپ ەتەتىن ماماندىقتى تاڭدادى. سوڭعى دەمىنە دەيىن ولار ماماندىقتارىنا ادالدىق تانىتتى. مەملەكەت باسشىسى ازاماتتاردىڭ دەنساۋلىعىن قورعاۋداعى ولاردىڭ كۇش-جىگەرلەرىن ۇنەمى ەسكەرىپ، العىس ايتىپ كەلەدى. مەملەكەتتىك ماراپاتتار – شىنايى العىس پەن ريزاشىلىقتىڭ بەلگىسى»، - دەدى بەردىبەك ساپارباەۆ.

ارىپتەستەرى مارقۇمداردىڭ ماماندىعىنا ادالدىعى مەن بىلىكتىلىگىن العا تارتىپ، زور قۇرمەتپەن ەسكە الادى. ولاردىڭ بارلىعى دا ءوز جۇمىستارىندا جەتىستىككە جەتۋ ءۇشىن تاباندىلىق تانىتىپ، ايانباي تەر توكتى.

داۋلەت ارىمباەۆ شامامەن 30 جىلداي عۇمىرىن وسى سالاعا ارناعان. 1965 جىلى جامبىل وبلىسىندا دۇنيەگە كەلگەن ول وسى جىلدار ىشىندە تالاس اۋداندىق اۋرۋحاناسىندا ءبولىم مەڭگەرۋشىسى، جامبىل وبلىستىق تۋبەركۋلەزگە قارسى ديسپانسەرىندە تۋبەركۋلەزگە قارسى مامان، سوت-مەديتسينالىق ساراپشى بولىپ جۇمىس ىستەگەن. 2010 جىلدان بەرى جامبىل وبلىستىق فتيزيوپۋلمونولوگيا ورتالىعى باس دارىگەرىنىڭ ورىنباسارى بولىپ قىزمەت اتقارعان.

ال، گۇلميرا قىرعىزاليەۆا ەڭبەك جولىن ۋچاسكەلىك دارىگەرلىكتەن باستاعان. «حيمپروم» دپو كلينيكاسىندا، تاراز قالاسىنىڭ № 2.8 ەمحانالارىندا تەراپەۆت بولىپ جۇمىس ىستەدى. 2018 جىلدان باستاپ «Almaz Medical Group» جشس ءبولىمىن باسقارعان.

سول سياقتى، ايدار مۇقاتاەۆتىڭ ەسىمى شۋلىقتارعا جاقسى تانىس. 2003 جىلدان باستاپ اۋداندىق اۋرۋحانانىڭ باس دارىگەرى بولىپ ەڭبەك ەتكەن ول وعان دەيىن تاراز قالالىق اۋرۋحاناسىندا حيرۋرگ، ءبولىم مەڭگەرۋشىسى بولىپ جۇمىس ىستەگەن.

«قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى» توسبەلگىسىمەن، «ەرەن ەڭبەگي ءۇشىن»، «وبلىسقا سىڭىرگەن ەڭبەگى ءۇشىن»، «10 جىل استانا»، «تاۋەلسىزدىككە 20 جىل» مەدالدارىمەن ماراپاتتالعان. شۋ اۋدانىنىڭ اكىمى نۇرجان كالەندەروۆ مارقۇم دارىگەردىڭ وتباسىنا مەملەكەتتىك ناگرادانى ارنايى بارىپ تابىس ەتتى.

 

سوڭعى جاڭالىقتار