15 شىلدە, 17:57 1077 0 جاھان انار لەپەسوۆا

امەريكالىق كومپانيا كوروناۆيرۋسقا قارسى ۆاكتسينانى سىناپ كوردى

اقش-تىڭ Moderna كومپانياسى كوروناۆيرۋسقا قارسى ۆاكتسينانى كلينيكالىق سىناۋدىڭ العاشقى كەزەڭىن اياقتادى. سىناق ناتيجەسىندە ەكپە ەگىلگەن ادامداردا انتيدەنەلەر پايدا بولعان. بۇل تۋرالى New England Journal of Medicine باسىلىمى حابارلادى.

باسىلىم مالىمەتىنشە، سىناققا 18-دەن 55 جاسقا دەيىنگى دەنى ساۋ 45 ەرىكتى قاتىسقان. ولار 15 ادامنان ءۇش توپقا ءبولىنىپ، ءار توپقا mRNA-1273 ۆاكتسيناسى 28 كۇن ۇزىلىسپەن ءار ءتۇرلى مولشەردە 2 رەت ەگىلگەن. ءبىرىنشى ۆاكتسينالاۋدان كەيىن زەرتتەۋگە قاتىسۋشى ءۇش توپ مۇشەلەرىندە العان ۆاكتسينانىڭ دوزاسىنا پروپورتسيونالدى انتيدەنەلەر تۇزىلگەن. ەكىنشى ۆاكتسيناتسيادان كەيىن انتيدەنە سانى ەسەلەنە تۇسكەن. ەڭ از دوزالى ۆاكتسينا ەگىلگەن ەرىكتىلەردىڭ ازعاسىندا ەڭ كوپ انتيدەنە پايدا بولىپتى.

سىناققا قاتىسۋشىلاردىڭ جارتىسىندا ۆاكتسيناتسيالاۋدان كەيىنگى كەرى اسەرلەر بايقالعان. ەكىنشى ەكپەدەن سوڭ شارشاۋ، قالتىراۋ، باس اۋرۋى، بۇلشىقەتتەگى اۋىرسىنۋ سەكىلدى بەلگىلەر پايدا بولعان.

دەسە دە،  سىناقتىڭ كەلەسى كەزەڭىنە كوشۋگە كەدەرگى كەلتىرەتىن جاعدايلار بولماعاندىقتان، ماماندار ەكپەنى ازىرلەۋ جۇمىستارىن ءارى قاراي جالعاستىرۋعا دايىن.

ايتا كەتەيىك، بۇعان دەيىن كوروناۆيرۋسقا قارسى رەسەيلىك ۆاكتسينانىڭ كلينيكالىق سىناعى ءساتتى اياقتالعانىن حابارلاعانبىز. سەچەنوۆ ۋنيۆەرسيتەتىنىڭ ترانسلياتسيالىق مەديتسينا جانە بيوتەحنولوگيالار ينستيتۋتىنىڭ ديرەكتورى ۆاديم تاراسوۆ سىناققا قاتىسقانداردىڭ العاشقى توبى 15 شىلدەدە، ەكىنشى توبى 20 شىلدەدە اۋرۋحانادان شىعارىلاتىنىن ايتقان.

سوڭعى جاڭالىقتار