15 شىلدە, 13:11 597 0 جاڭالىقتار اسىل تۇمار

«دارىگەرلەرگە مىڭ العىس» اكتسياسى باستالدى

الماتىدا «دارىگەرلەرگە مىڭ العىس» اكتسياسى باستاۋ الدى. اكتسيانىڭ ءمانى – 4 ايعا جۋىق ۋاقىت بويى ءوز ءومىرىن قاتەرگە تىگىپ، بۇگىنگى قوعامنىڭ باتىرىنا اينالعان اق حالاتتى ابزال جاندارعا جاستار اتىنان العىس ءبىلدىرۋ، قولداۋ كورسەتۋ.

الەمدى جاۋلاعان «COVID-19» كوروناۆيرۋستىق ينفەكتسياسى ەشكىمدى بەي-جاي قالدىرمادى. وسىنداي سىن ساعاتتا ءبىرىنشى كەزەكتە اق حالاتتى ابزال جاندار وزگەلەردىڭ ءومىرى ءۇشىن ايانباي كۇرەسۋدە.

ەرىكتىلەر 800-دەن استام دەنساۋلىق سەبەتىن دايىندادى. جيىنتىق يممۋنيتەتتى ارتتىرۋ جانە نىعايتۋعا ارنالعان ونىمدەردەن قۇرالعان.

«بۇگىنگى تاڭدا قازاقستاندا كوروناۆيرۋستى جۇقتىرعانداردىڭ سانى بىرنەشە ونداعان مىڭ ادامعا جەتتى. بىراق مەديتسينا قىزمەتكەرلەرىنىڭ قاجىرلى ەڭبەگىنىڭ ارقاسىندا كوپتەگەن ادامدار اياققا تۇردى. دارىگەرلەر ادام ءومىرى ءۇشىن تاۋلىك بويى كۇرەسۋدە. بۇل قايىرىمدىلىق اكتسياسىمەن ءبىز دارىگەرلەرگە جىلۋ سىيلاپ، قولداۋ كورسەتىپ، بىرگە ەكەندىگىمىزدى جەتكىزگىمىز كەلەدى»، – دەدى ەرىكتى بەكەمباي ساحي.

اكتسياعا الماتى قالاسى بويىنشا كوروناۆيرۋستىڭ الدىن الۋ جانە بولدىرماۋ ۆەدومستۆوارالىق كوميسسيا قولداۋ كورسەتتى. اكتسيا بارىسىندا بارلىق ساقتىق شارالارى ەسكەرىلدى.

​اكتسيانىڭ العاشقى كۇنىندە جاسوتاندىق ۆولونتەرلەر ورتالىق قالالىق كلينيكالىق اۋرۋحاناعا، قالالىق كلينيكالىق جۇقپالى اۋرۋلار اۋرۋحاناسىنا جانە قالالىق جۇقپالى اۋرۋلاردىڭ كلينيكالىق بالالار اۋرۋحاناسى باراتىن بولادى.

سوڭعى جاڭالىقتار